Leita ivrig etter påskeegg i Vats

Søndag var det duka for den årlege påskeeggjakta som Vindafjord jakt- og fiskelag har arrangert i fleire år. Med palmesøndag og startskotet for påskeferien, var spenninga stor då grinda inn til barnehagen blei opna og jakta var i gong.

Det tok ikkje lang tid før uteområdet i Øvre Vats barnehage var fylt med ivrige ungar på jakt etter små, fargerike egg som var gøymde rundt omkring på området. Vindafjord jakt- og fiskelag stod som arrangør, og Øyvind Træet fortel at dette er ein tradisjon dei set pris på å halde ved like for dei minste i kommunen.

— Det er ein årleg tradisjon. Det er rebus og påskeeggjakt, med elleve spørsmål. Når dei har fylt opp bøtta si med egg, så kan dei byte det inn med ein godtepose, seier Træet.