Sport
Kalla inn på landslag
Det polske fotballforbundet har sendt innkalling til Nikolai Tendal (16) frå Etne for å få han med på samling med G17-landslaget deira. Etnebuen kan spele for både Noreg og Polen fram til han eventuelt må ta eit endeleg val på seniornivå.
Nikolai Tendal signerte proffkontrakt med FK Haugesund i 2024, og det er klubben som melder om landslagsuttaket.
Då han fekk proffkontrakt, hadde Nikolai Tendal allereie lengre fartstid i FKH sitt Kraftakademi, der veslebroren Lukas Tendal (14) er ein av fleire spelarar frå Etne og Vindafjord.
Annonse
Mange mål
Det polske G17-landslaget skal ha samling i Siedlce, om lag 10 mil aust for Warszawa, frå 10. til 13. november. Nikolai Tendal er spiss og har i 2025 skåra sju mål på tolv kampar for G17 og eitt mål på to kampar for G19.
I yngre år spelte Tendal barne- og ungdomsfotball heime i Etne IL. På sitt siste år i klubben, som 13-åring i 2022, skåra han 37 mål på 15 seriekampar for G13-laget – der han også vann Etnecup – og ni mål på tolv seriekampar for G14-laget.
God tid til å velje
Annonse
Etnebuen har tidlegare vore på talentsamling med Norges Fotballforbund (NFF). Gjennom si polske mor er han speleberettiga for Polen i tillegg til Noreg. Han kan spele for begge land fram til han eventuelt må ta eit endeleg val på seniornivå.
FIFA-reglane seier at ein spelar kan byta landslag så lenge han har spelt færre enn tre landskampar på seniornivå før han fyller 21 år, og så lenge han ikkje har spelt for landslaget på minst tre år.
Mange profilerte norske og internasjonale fotballspelarar har vore innom landslagssystemet i fleire land, eller hatt høve til å vere det. Eit eksempel er den norsk-marokkanske Lille-spelaren Osame Sahraoui, som etter aldersbestemte landskampar og ein seniorlandskamp for Noreg i 2023 valde å spele for Marokko i 2024. Det kanskje mest profilerte eksempelet dei siste åra er Arsenal-spelaren Declan Rice, som spelte aldersbestemt fotball og tre seniorkampar for Irland før han valde å spele for England i 2019.
