Heidra for dugnad på banar og styrerom

— Det er kjekt å bli sett pris på, og at arbeidet ein gjer saman med resten av idrettslaget blir lagt merke til, seier Johnny Vik.

I tillegg til leiarskapet i idrettslaget er Vik med i trenarteamet til G19-laget og J17, som er eit samarbeid mellom Etne IL og Ølen IL. Med prisen til Vik får Ølen IL tildelt 25.000 kroner. Bruken av desse vil bli diskutert på neste styremøte.

Skapt miljø for alle

Prisen blei delt ut av banksjef Magne Christiansen ved SpareBank 1 Sør-Norge sitt kontor i Ølen, som las opp grunngivinga frå juryen:

Johnny Vik får Ildsjelprisen for sitt omfattande og målretta engasjement i Ølen Idrettslag. Som både leiar i idrettslaget og trenar for ungdomslaga G19 og J17 legg Johnny ned ein imponerande innsats for å skape gode og inkluderande tilbod for barn og unge i lokalmiljøet. Han er ein drivkraft bak både dagleg aktivitet og store utviklingsprosjekt, og han har vore sentral i planlegginga av ny fotballhall og etableringa av Ølen Kiwi–Bama Cup.

Johnny er kjend for å skape engasjement og trivsel, anten det er gjennom fotballskule, opent klubbhus, små konkurransar eller tiltak som Grannarligaen» under pandemien. Han har òg vore initiativtakar til ungdomssatsinga Flest mogleg – lengst mogleg, som har gjort at Ølen IL har klart å halda på ungdomane i idretten lenger enn mange andre.

Gjennom si tilstadeværelse, kreativitet og evne til å få med seg andre har Johnny skapt eit miljø der alle kjenner seg velkomne – uansett ferdigheitsnivå. Han er eit førebilete for både unge og vaksne, og ein ekte eldsjel som set fellesskap og barnas beste først.»

Motivert av glede

Spurd om kva som driv han til å leggje ned så mykje tid og energi i idrettslaget, seier Vik at det er veldig kjekt å jobbe med ungdom og sjå at dei har kjekke og meiningsfulle aktivitetar.

Vik likar òg å vere del av eit idrettslag saman med folk som brenn for det same. Han finn inspirasjon i samarbeidet med Etne IL, og trur at det å vere trenar for to lag er positivt for jobben han gjer som styreleiar. Han meiner at når ein skal vere leiar i ein organisasjon, gir det betre forståing å vere direkte involvert i arbeidet.

— Du får sjå alt det gode ved idrettslaget på nært hald, noko ein ikkje alltid får frå eit styrerom, seier Vik.

J17-laget består av spelarar frå Vikebygd, Skånevik, Etne, Ølen, Ølensvåg og elevar på Lundeneset. G19-laget har totalt rundt 40 spelarar, derav vel ein fjerdel er internatelevar på Lundeneset, medan resten bur i Vindafjord kommune. Ifølgje Vik har året vore triveleg for begge lag.

— Me hadde ei undersøking der dei fleste svarte at dei går på fotball først og fremst fordi dei møter venner der, fortel han.

I ungdomsåra har mange ein travel kvardag med jobb og skule. Difor er det viktig for idrettslaget å skape plass både til dei som vil trene mest mogleg, og dei som må prioritere andre ting og er med så mykje dei kan.

God dugnad

Ein sentral del av Ølen IL er ungdomssatsinga Flest mogleg – lengst mogleg. Vik synest dei har lykkast godt, og viser til at dei har høg deltaking blant ungdom samanlikna med landssnittet.

— Me er opptekne av å stille lag i flest mogleg årsklassar, og me samarbeider med andre klubbar der det trengst, seier styreleiaren.

Han trekkjer fram at G19-laget truleg kan stille to lag neste sesong, noko ikkje mange klubbar på deira storleik i Rogaland klarer. Generelt meiner han utviklinga i idrettslaget har vore positiv dei siste åra. Det har kome nye tilbod som basketball, og dei har etablert Kiwi Bama Cup.

Struktur har vore ein viktig del av utviklinga. Nyleg blei fotballgruppa resertifisert som kvalitetsklubb av Norges Fotballforbund. Idrettslaget har trenarar til alle laga sine.

— Dugnadsånda lever i beste velgåande, seier Vik.

Ser lyst på framtida

Med stor oppslutnad om fotballen er kapasiteten på idrettslaget sine to banar pressa. Difor skal dei byggje ein fotballhall i 9ar-storleik like ved 11ar-banen. No blir det jobba med å få godkjent teknisk plan.

— Me håpar å få sett i gang grunnarbeidet på nyåret, og me prøver å unngå at det kjem midt i fotballsesongen, fortel styreleiaren.

Får dei gjort dette før sommaren, håpar dei at hallen kan stå klar tidleg i 2027. Det avheng av fleire ting, mellom anna rekkjefølgjekrav som involverer Vindafjord kommune. Vik understrekar at dei opplever kommunen som samarbeidsvillig og løysingsorientert.

Bedt om å sjå fem år fram i tid håpar styreleiaren at fotballhallen har blitt ein god samlingsplass, der ein i tillegg til kampar og trening ser barn og unge som driv uorganisert frileik.

Om fem år håpar han òg at idrettslaget har fått eit endå betre tilbod for vaksne, slik at me kan bidra til god folkehelse – både fysisk og psykisk – og at dei held fram den gode utviklinga innan både basketball og handball. Slik vil Vik at idrettslaget skal bidra til eit breitt fritidstilbod i Grannar-distriktet.