Etnebu skal leie idrettslag

— Korleis landa de på desse tre?

— Dei har vore veldig engasjerte i klubben gjennom mange år allereie, og alle har hatt eit ønskje om å bidra meir. Me ser òg at det kan vere einsamt å vere åleine i ei slik stilling, og at me vil få ein fordel av at tre personar jobbar saman, seier Espen Bjørgen til Tysvær Bygdeblad.

Bjørgen er styreleiar i Skjold Idrettslag.

— Det å ha denne tredelinga gir òg nokre fleksibilitetar, seier nestleiar i styret, Jan Vidar Strømsvold, og held fram:

— Her kan dei utfylle kvarandre med sine personlege styrkar.

Skjold IL blei stifta i 1960 har aktivitetstilbod innan allidrett, fotball, handball og innebandy. Idrettslaget har rundt 400 medlemmar og 50 frivillige. Skjold klubbhus ligg i Grinde.

Gode lokale kandidatar

Klubben var på jakt etter ein engasjert og strukturert dagleg leiar som hadde evne til å motivere frivillige til innsats.

— Skjold IL er ein breiddeklubb, og me treng ein leiar som brenn for breidde og ungdomsarbeid, stod det i utlysinga.

Dei nye leiarane får overordna ansvar for å drive klubben vidare og påverke utviklinga av Skjold IL. Styret er godt nøgd med resultatet.

— Me var heldige med søkjarane. Me hadde ti gode søkjarar med relevant bakgrunn og erfaring innan idrett og medlemsorganisasjonar, seier Bjørgen.

Styret la vekt på det lokale engasjementet desse tre har vist gjennom mange år. Myge, Rydningen og Johnsen har alle hatt barn i klubben og vore trenarar for deira fotballag. Myge har òg sete to år i fotballutvalet og vore med som frivillig på fotballskulen.

— Med tre aktive ungar i klubben blir det naturleg at ein får lyst til å bidra, seier Myge, som opphavleg er frå Etne, men har budd i Grinde dei siste elleve åra. Ho har lang fartstid som fotballspelar i Etne IL.

Bjørn Skjoldevik Johnsen har hatt ulike roller i klubben og fotballutvalet sidan 2010, medan bømlingen Rune Rydningen har hatt dei fleste rollene i klubben, og var med på å starte både akademiet og damelaget.

Jobbar med engasjement

På spørsmål om kven av dei som blir Skjold sitt ansikt utetter, svarar Myge kjapt at det blir Rydningen.

— Me har blitt einige om ansvarsområde, men må sjølvsagt samarbeide om alt, seier ho.

Rydningen, Myge og Johnsen er tilsette i like store stillingar – 33,33 prosent kvar.

— Kva oppgåver skal dei nye daglege leiarane ta fatt på først?

— Dei skal først og fremst jobbe med fotballskulen, og så skal me få nye nettsider, seier Bjørgen.

— Og så skal dei jobbe med å skape engasjement i klubben. Det er ikkje til å stikke under stol at frivilligheita har vore dalande dei siste åra. Det skal trioen jobbe med å få opp att, seier han.

Strømsvold gler seg over signeringa.

— Det er ikkje tvil om at oppgåvene hamnar i trygge hender, seier han.