Viktig avtale for Omega-selskap

— Dette er ei viktig avtale for oss i Bergen, både fordi det er ein ny kunde, og fordi me får bidra innan energidistribusjon. Det er kjekt å kunna samarbeida med ein aktør som sit rett over vegen, og som har ei så tydeleg rolle i regionen. Me ser fram til eit godt samarbeid og til å levera kompetanse som styrkjer prosjekta til BKK, seier Stian Bjørkheim, avdelingsleiar for Omega 365 Consulting i Bergen, i ei pressemelding.

Omega 365 Consulting leverer teknisk og prosjektadministrativ kompetanse til kundar i Noreg og internasjonalt. Selskapet har hovudkontor i Ølensvåg, i tillegg til kontor i Stavanger, Haugesund, Oslo, Bergen og Harstad, og tilbyr personell med ekspertise innan ingeniørfag, IT, prosjektleiing, bygg og anlegg, infrastruktur, subsea og maritime operasjonar. Dei støttar prosjekt på tvers av eit breitt spekter av bransjar, inkludert olje og gass, energi og infrastruktur, og leverer konsulentar skreddarsydde for behova til kundane. I 2024 omsette dei for over to milliardar kroner.

Med meir enn 1.000 tilsette er Omega 365 Consulting ein integrert del av Omega 365-konsernet, som har over 2.300 tilsette over heile verda.

Samfunnskritiske prosjekt

Gjennom avtalen skal Omega 365 Consulting levera ingeniørtenester innan planlegging, dokumentkontroll, prosjektering, prosjektleiing og byggeleiing, samt andre tenester. Konsulentane vil støtta prosjekta til BKK innan nettutbygging, anlegg og teknisk prosjektstyring, der krav til kvalitet, tryggleik og effektiv gjennomføring står sentralt.

I første fase skal Omega 365 Consulting levera personell til fleire sentrale stillingar, inkludert planleggjar, dokumentkontrollør, prosjekteringsleiarar, prosjektingeniørar og byggeplassleiarar. Desse stillingane er allereie lyst ut, og konsulentane vil gå inn i prosjektteama til BKK og bidra til framdrift, kvalitetssikring og dokumentasjon i pågåande og komande prosjekt.

Avtalen legg til rette for eit tett samarbeid mellom dei to selskapa og gjev Omega 365 Consulting moglegheit til å bidra i langsiktige, samfunnskritiske prosjekt i regionen.

Ny sektor

 Ifølgje pressemeldinga representerer avtalen ei naturleg utviding av verksemda til Omega 365 Consulting inn i energidistribusjon, ein sektor som spelar ei viktig rolle i den grøne omstillinga. Selskapet har allereie ein sterk posisjon innan olje og gass, bygg, infrastruktur og fornybar energi, og erfaringa frå komplekse tekniske prosjekt gjev grunnlag for vidare vekst.

BKK er ein av Noregs største distributørar av elektrisk energi, med over 270.000 nettkundar og eit straumnett på rundt 22.500 kilometer. Selskapet har hovudkontor i Bergen. I pressemeldinga blir det slått fast at samarbeidet skal bidra til å sikra nødvendig fagkompetanse i ein marknad med aukande behov.