Tre gutar hamna i sjøen under kongebesøket

Joachim Sund, Josef Bø og Samuel Joakimsen padla i kano frå Ølensvåg til Ølen for å sjå på kongen under kongebesøket. Etter å ha fått med seg heile arrangementet, gjekk dei tilbake i kanoen då kongen la frå kai og padla utover Ølensjøen. Men det gjekk ikkje som planlagt.

Vinka samtidig

Då alle tre skulle vinka til kongen samtidig, vart det for mykje vekt på eine sida av kanoen.

— Det blei nok litt mykje vekt på eine sida då me vinka, så då hamna me i sjøen, fortel Joachim Sund.

Det var mange båtar på sjøen då dei velta, og heile seks båtar kom til for å hjelpa. Men det var politiet som fekk dei opp frå sjøen. Dei tok det heile med eit smil, og det var nokon lattermilde gutar Grannar traff på etter hendinga. Dei hadde fått på seg tørre klede og var ferdige med å tømma kanoen for sjøvatn.

— Det var kjekt heilt til me velta, seier Joachim Sund.

Mista mobilen

Han synest ikkje sjølve veltet var så gale, men det verste var at mobilen hans no ligg på botn av Ølensjøen. Josef Bø trur han har redda mobilen sin, og står iherdig og tørkar den medan Grannar tek bilete av dei.

— Men det var varmt i sjøen då, seier Josef Bø med eit smil.