Stoppar barnehage- og SFO-kutt

— SFO og barnehage er ekstremt viktige tilbod, sa Mats Årvik under eit formannskapsmøte tysdag.

Sp, KrF og Ap har i utgangspunktet eit budsjettsamarbeid, men alle dei sju partia i Vindafjord kommunestyre står bak fellesforslaget. Det blir lagt ut på høyring fram til endeleg vedtak i kommunestyret 16. desember.

Vil kartleggje behovet

Kommunedirektør Yngve Folven Bergesen foreslo i sitt framlegg til budsjett for 2026 og økonomiplan for 2026–2029 å redusere opningstider i SFO og barnehagar i Vindafjord, så vel som å avvikle ferietilbodet for SFO. Forslaget gjekk ut på å redusere opningstida i skulefritidsordninga med éin time per dag.

Ferie-SFO er eit frivillig tilbod i Vindafjord kommune som blir organisert i skuleferiane. Full feriepakke i SFO er to veker i august før skulestart (med unntak av to planleggingsdagar), fem dagar i haustferien, frå skuleslutt til og med 23. desember (romjula er stengd), fem dagar i vinterferien, tre dagar i påskeveka og frå skuleslutt og ut juni månad. Tilbodet blir gjennomført ved to skular, Ølen og Skjold, og er bemanna med totalt ni fagarbeidarar, fordelt på 4,5 årsverk ved kvar skule.

Dei politiske partia går inn for å ikkje gjere kutta kommunedirektøren foreslår.

— Me vil ha opningstider i barnehage og SFO som samsvarar med eit moderne familieliv, sa Øyvind Valen (Ap) då han presenterte fellesbudsjettet.

I eit verbalvedtak blir det påpeika at kommunestyret likevel ser at det kan vere nødvendig å sjå på desse tilboda. Difor ber dei kommunedirektøren kartleggje bruken av tilboda, altså kor mange som kjem før klokka 07.00 eller er til etter 16.00/16.15. Dei vil også at han skal vurdere om det kan vere aktuelt, gjennom vedtektene, å avgrense tilbodet til 45 timar i veka, slik at foreldre bestiller intervallet dei skal ha.

Kommunedirektøren blir òg beden om å vurdere om det er mogleg å effektivisere gjennom ei endå større grad av samordning av barnehage og SFO i starten og slutten av dagen i bygdene der kommunen har begge tilboda. Dersom kartlegginga eller vurderingane gir grunnlag for ny vurdering, ber kommunestyret om sak seinast september/oktober 2026.

Vernar dei frivillige

Eit anna kuttforslag i Folven Bergesen sitt budsjettframlegg som møtte motstand, handlar om støtte til frivillige organisasjonar. I budsjettet for 2025 blei det lagt inn 100 000 kroner til tilskot til rusførebygging knytt til rusfrie tiltak og arrangement retta mot ungdom, og ei styrking av tilskotspotten til frivillige lag og organisasjonar på 450 000 kroner.

Kommunedirektøren foreslo å ta ut igjen desse tilskotspotane for å møte krava til innsparing som kommunestyret la inn i oppvekstsektoren i førre økonomiplan.

Politikarane har tatt inn igjen desse pengane. Modolf Haraldseid (H) synest dette er eit viktig grep. Han viste til at Vindafjord kommune ligg under snittet på støtte til kultur i tala frå kommune-stat-rapportering (KOSTRA).