Stø kurs for kjøkken-familien

— Det er kanonbra å ha Vegard og Håvard med, seier Øyvind Nordtveit.

Han er i dag styreleiar med fast kontor på Knapphus i Vats. I tillegg reiser han rundt til kundar med produksjonssjef og aksjonær Kjetil Ohm.

Øyvind og kona Venke starta Ølen Kjøkkensenter i Ølen i 1988. Venke er i dag kjøkkenkontrollør. I 1995 flytta bedrifta til Vats og skifta namn til Knapphus Kjøkkensenter. I 2012 opna dei ein butikk i Odda og gjennom oppkjøp fekk dei ei avdeling på Karmøy i 2018. Bedrifta har 18 tilsette. Vegard og Håvard Nordtveit eig 30 prosent kvar, mens Kjetil Ohm og kjøkkendesignar Tore Nordtveit begge eig 20 prosent.

Avdelinga i Vats består av ein butikk med utstilling av kjøkken, bad, garderobeløysingar og vaskerom, så vel som snekker- og plateverkstad, montasjehall og lager, og hovudkontoret.

Stabilt i pluss

2022 blei eit svært godt år for bedrifta. Omsetnaden auka frå 49,6 millionar kroner i 2021 til 58,9 millionar i fjor. Det førte til eit driftsresultat på 2,9 millionar og rett under to millionar i årsresultat.

— Det var vårt første heile år med Tigne-konseptet og me var involverte i ein del prosjekt, blant anna leilegheitskompleks. I tillegg fekk me full nytte av vårt nye digitale system, fortel dagleg leiar Vegard Nordtveit.

Han ser den store veksten i fjor litt som ein etterverknad av korona. Totalt selte dei cirka 300 kjøkken i 2022. 2023 ligg ifølgje Vegard ikkje ann til å bli like bra, men cirka som 2021, då dei hadde eit driftsresultat på 994.000.

— Eg trur me må seie oss fornøgd med det, seier Vegard.

Bedrifta har hatt positivt driftsresultat kvart år sidan 2014. Vegard fortel at dei etter å ha jobba hardt har klart å komme seg inn på nybyggmarknaden dei siste åra. Han meiner at resultata kjem av gjengen som står på heile tida på både sal, lager, produksjon og montering.

Fotballen hjelper salet

Litt av grunnen til at 2022 var eit så godt år er at dei gjorde prosjekt utover nærområda til butikkane. Mykje av dette skuldast kontaktnettverket Håvard Nordtveit har opparbeida seg gjennom proffspel i fire land og kampar for alle aldersbestemte landslag og 52 kampar for seniorlandslaget.

Håvard fortel at han får med meg det som skjer og er ein bidragsytar. Han har følgd prosjekt i Oslo tett og har vore spesielt involvert i salet av Tigne-konseptet.

— Det er retta mot kundar som er på jakt etter det litle ekstra, fortel Håvard.

Tigne-kjøkken er skreddarsydde kjøkken der kundane får tett oppfølging frå start til slutt gjennom prosjektet. I tillegg til kjøkken gir Tigne-konseptet også moglegheita til å få produsert det meste ein vil av andre møbler, slik at kundane som ønskjer det får same utføring på desse. I 2022 stod Tigne for cirka ti prosent av salet til verksemda. Håvard fekk selt inn kjøkkenet til Jim Solbakken, som er sjefen hans i agentfirmaet Player Solution, og har fått selt fleire via kontaktar av Solbakken.

Håvard har også brukt Tigne i sine eigen oppussings- og bustadprosjekt. Etter å ha sett foreldra jobbe med kjøkken gjennom livet synest Håvard at det er kjekt å få sjå korleis det jobbast frå innsida. Øyvind og Vegard set stor pris på å ha Håvard med.

— Det er ikkje tvil om at me har fått til ein del ekstra gjennom fotballkontaktane hans, seier Øyvind.

Naturtrend

Med Tigne har bedrifta fleire bein å stå på. Dei taklar svingingar i marknaden godt.

— Me har merka litt mindre aktivitet på hytter dette året, men har nok å gjere likevel, fortel Øyvind.

Han trekk fram at dei har hatt ein del kundar rehabiliteringsprosjekt i 2023. I Vats har dei kapasitet til å produsere to kjøkken i veka, eventuelt eit kjøkken og to bad. Dei har Strai som kjøkkenleverandør.

Sidan 1988 har trendane innanfor kjøkken og bad endra seg og det er viktig at bedrifta følgjer med. Både utsjånad og brukarvennlegheit er i fokus hos kundane. Øyvind merker seg at naturtrenda som kom for nokre år sidan har haldt seg, og at beisa eik er populært. Det har også vore mykje nytt innan kvitevarer som verksemda har oppdatert seg på.

Godt miljø

Det var i mars 2022 at Vegard overtok som dagleg leiar. Han er utdanna innan rekneskap og blei tilsett for 11 år sidan. Med eit styreverv i tillegg fekk han god innsikt i bedrifta. Han blei glad når han blei spurt om å ta hovudansvaret og har nytt tida sidan.

— Det er veldig kjekt at pappa framleis er med. Han er ein god støttespelar, seier Vegard.

Han rosar også resten av dei tilsette og styret, og omtalar dei som ein god gjeng.