Stemte i heimbygda: — Spenning i lufta

— Det har vore som ein vanleg dag, men det er litt meir spenning i lufta, fortel ordførar Ole Johan Vierdal (Sp).

Vatsbuen har vore ordførar sidan 2011 og stiller til val for ein fjerde periode.

Ingen plan B

Han starta dagen som vanleg med turen inn til ordførarkontoret i Ølen, før han køyrde tilbake til Vats for å stemme. Ordføraren synest at han måtte stemme i sin heimkrins, og kjenne på stemninga. Vats er den einaste bygda som har eit nytt vallokale til denne gongen, nemleg bedehuset Arken.

— Eg møtte mykje kjensfolk der, seier Vierdal.

Etter at han hadde stemt tok han ein tur heim. I kveld skal han og resten av politikarane i Vindafjord på ei felles valvake på rådhuset i Ølen. Vierdal har ikkje tenkt på kva han skal gjere dersom han må gå av.

— Eg har ingen plan B, fortel ordføraren.

Håpar på rask avklaring

Dersom Vierdal må gå av etter valet heiter Vindafjord sin neste ordførar høgst truleg Modolf Haraldseid (H). Også han møtte på jobb som vanleg på valdagen. Mot slutten av arbeidsdagen kjenner han seg litt spent.

— Eg kan ikkje sei at det er ein heilt normal dag, fortel Haraldseid.

I kveld skal han stemme, før turen går til valvaka på rådhuset. Dei første resultata begynner å tikke inn klokka 21. Haraldseid minnast at ein hadde mandatfordelinga klar ganske tidleg for fire år sidan. Når den kjem blir politikarane nøydde til å begynne å stokke korta for kven dei vil samarbeidde med for å skape politiske fleirtal.

— Eg er litt usikker på om det blir forhandlingar i kveld, men me ønskjer å få avklart eventuelle samarbeid så fort som mogleg, seier Haraldseid.

Dersom han skulle bli ordførar blir det ein heilt ny jobb for Haraldseid. Han er veldig motivert for å gjere ein jobb for Vindafjord og synest det er mange interessante oppgåver å ta fatt på.

Du kan følge valresultat og reaksjonar fortløpande på grannar.no.

Alle sakene om valet er samla på denne linken: Kommuneval 2023