Skadar for fleire millionar etter brannen i Tysvær Arena

(TYSVÆR BYGDEBLAD): Denne veka blir det jobba for fullt for å klargjere idrettshallen slik at skulelevar og alle dei andre som nyttar hallen kvar einaste dag, skal få flytte inn igjen. Men brannen i garderoben viser seg å vere langt meir omfattande enn dei første meldingane fortalde, dei kom ved lunsjtider den første skuledagen etter juleferien.

– Ut frå dei undersøkingar som me har gjort etter brannen i Tysvær Arena så langt, anslår me et skadeomfang på mellom halvannan og to millionar kroner før meirverdiavgift, seier Anne Løversbakke, som er avdelingsleiar for oppgjer innanfor eigendom og innkjøp i KLP Skadeforsikring.

– Det kan me heilt klart slå fast. Når me nå har fasit i handa kan me nok ein gong bekrefte kor store konsekvensane kan bli når ein gjer slikt. Ingen kunne sjå føre seg at me skulle bruke millionar av kroner på å vaske ned og rydde opp etter ein brann i ei bossbøtte i ein garderobe. Nå fortel me historia i håp om at både barn og vaksne kan snakke saman om konsekvensane av å gjere slikt, seier Ole Jonny Espevold i Tysvær kommune.