Sel Tongane-tomt mot opsjon

Det går fram av e-postar som Grannar har fått innsyn i. Dei viser at i samband med ein førespurnad entreprenør Oddvar Flatebø fekk, om å selje industriområdet han i si tid kjøpte av Etne kommune på Tongane til Renevo, bad han kommunen om å få opsjon på kjøp av tilsvarande areal på Fikse for å ville selje sine areal til Renevo AS.

Renevo AS ønskte Flatebø sitt areal for å få enkel tilgang til kai for sin planlagde biogassfabrikk.

Utfordringa for kommunen var at ingen av dei komande tomtene på Fikse førebels er lagt ut for sal i den opne marknaden på Fikse. Planen er å starta arbeidet med å etablere naudsynt infrastruktur i haust.

Lukka møte

Etne formannskap drøfta spørsmålet om opsjonen i eit lukka formannskapsmøte 20. april i år. Spørsmålet om opsjonen skal ha kome opp like før møtet, og var ikkje meldt inn som ei ordinær sak. Men ordføraren måtte orientere formannskapet om saka og få deira godkjenning til å love ut ein slik opsjon. Formannskapet var udelt positive til å gi opsjonen, som ville vere med på å sikre ny verksemd og arbeidsplassar i kommunen.

Mogelegheitene for å kunne inngå ein slik opsjonsavtale vart på vegner av Etne kommune vurdert opp mot EU/EØS-regelverk av kommuneadvokat Thorbjørn Lie Lotsberg i Karmøy. Han gav grønt lys i ein e-post 22. april, og dagen etter stadfesta ordførar Mette Heidi Bergsvåg Ekrheim (Sp) overfor Flatebø at han vil få opsjonen han ønskte.

Må kjøpe til takst

Tomta på Fikse, nær kommunegrensa til Vindafjord, må Flatebø eventuelt kjøpe til takst, og kva del av arealet han i så fall vil få tilbod om vil bli avklare med kommuneleiinga i samband med prosjekteringa av feltet.

Oddvar Flatebø har drive verkstad og lager for si entreprenørverksemd på Tongane. I den grad han ser føre seg å flytte denne aktiviteten til Fikse vil han ikkje kommentere enno.

— Me må sjå om det blir noko av planane på Tongane først, seier han.

Han viser til at den offentlege behandlinga av Renevo sin byggesøknad og utsleppsløyve står att før eit eventuelt sal er eit faktum.

— Skulle det vise seg å ikkje gå som planlagt, så vil heller ikkje eit kjøp av areal på Fikse vere aktuelt, poengterer han.

Snart klar med søknad

Det var i juni i år at Renevo AS lanserte planar om å bygge eit stort biogassanlegg på Tongane i Etne. Selskapet er snart klar med ein formell byggesøknad til Etne kommune. Det opplyser dagleg leiar Jan Kåre Pedersen.

— Me har for tida to personar som jobbar fulltid med Etne-prosjektert, seier han.

I samband med byggemeldinga vil det også gå ut nabovarsel med detaljerte teikningar.

Samstundes med planlegginga av fabrikken i Etne jobbar selskapet for fullt med å få sin første fabrikk, på Eldøyane på Stord, opp og stå. Det er blitt noko forseinka.

— Grunna covid-19 har leverandøren av reaktorane som me treng, meldt at dei er noko over ein månad forseinka, seier han.

Planen deira om å begynne å produsere rågass på Stord på denne sida av nyttår held vatn, men ordinær drift av anlegget vil bli noko forseinka.

— Drifta vil kome i gang stykkevis og delt utover vinteren og våren, seier han.

Renevo AS som har fransk storkapital i ryggen, gjennom Gasnor AS som eig halvparten av aksjane og har opsjon på resten, vil ifølgje dagleg leiar Jan Kåre Pedersen, lansere planar for sin tredje norske fabrikk denne veka.