Opptatt av interiør og detaljar
Amalie Vestre (29) og sambuaren Kristian Kolbjørnsen (29) har planlagt godt før dei flytta inn i det nye huset sitt på Vikaneset i Skjold. Det ligg ein tanke bak det meste i huset, og Amalie som alltid har vore interiør-interessert, veit korleis ho vil ha det.
Dei har berre budd i huset sitt sidan påske, og framleis er det mykje som skal på plass før dei kan kalla seg heilt ferdige. Likevel er skjoldabuen Amalie Vestre storfornøgd med den nye heimen ho deler med sambuaren, Kristian, som for augeblikket er på jobb i havet.
Huset på Vikaneset ligg praktfullt til, med sol frå tidleg morgon til seine kvelden. Eit klassisk funkis-hus, med rette linjer, glas og betong, og som tydeleg ber preg av at her bur det nokon med tydeleg stil. Dette deler Amalie gjerne gjennom Instagram-kontoen sin @Amalie_Vestre.
— Eg har alltid vore interessert i interiør, og då me starta planlegginga av nytt hus jobba eg som back office manager» i bedrifta Sky Home. Her fekk eg tilgang til teikneprogram i 3D, der eg kunne teikna rom for rom og fekk planlagt alt i minste detalj. I tillegg brukte me Google Sketchup for å leggja grunnlaget for korleis me ville ha det. Så kopla me på både arkitekt og byggeleiar gjennom Kalstveit og Vik som er totalleverandør for huset, seier ho.
