Opprettheld Dommersnes-byggeløyve

Under møtet på Sjøperlo i Ølen blei klager frå Tor Johan Stuve, Jorunn Elise Omdal Kvamme, May Britt Vikingstad og foreininga Bevar Ålfjordens Perle behandla.

Isolert vedtak eller startskott for noko større?

I framlegget sitt til vedtak foreslo kommunedirektør Yngve Folven Bergesen å ikkje ta klagene til følgje. Dette vedtaket ville gjere at klagene blei sendt til Statsforvaltaren i Rogaland for endeleg avgjerd. Fleirtalet av politikarane i DUK støtta kommunedirektøren.

Jan Idar Haugen (Sp) er leiar i DUK, mens partikollega Solveig Hortman er nestleiar. Dei andre faste medlemmene i utvalet er Bjørn Alvseike (Frp), Åge Opheim (H), Hanne Kathrine Sørhus (KrF), Guri Ravatn (SV) og Ivar Ødegård (Vindafjordlista). Asle Dagsland (KrF) stilte som vara for Sørhus på møtet. Vindafjordlista og SV har tidlegare fremja forslag i kommunestyret om å behandle byggesøknaden politisk, utan å få støtte frå resten av partia. I DUK var dei også aleine mot dei andre partia, og klagene blei ikkje tatt til følgje med fem mot to stemmer.

I starten av saka kritiserte Ravatn saksinnkallinga på fleire plan og foreslo og utsette saka. Blant anna stilte ho spørsmål ved at klagar frå May Britt Vikingstad og Bevar Ålfjordens Perle på det justerte byggeløyvet blei tatt inn etter at saksinnkallinga først blei sendt ut 8. mars, og at utvalet berre fekk fem dagar på seg frå desse blei gjort tilgjengelege til møtet. Ho ønska også at utvalet skulle på synfaring på Dommersnes før ein gjer eit vedtak. Berre Ødegård støtta ho i dette, og saka blei behandla som planlagt.

Ødegård og Hortman, som begge bur i Vikebygd, stod på kvar si side i eit av dei sentrale spørsmåla i debatten, nemleg om ein skulle sjå på byggeløyvet for fase 1 isolert, eller som ein naturleg del av vegen mot fase 2 og 3. Begge to understreka at dei og dei fleste dei snakkar med i Vikebygd ser positivt på fase 1 og at det potensielt kan skje noko på det forholdsvis stille industriområdet, men basert på medieutsegn frå dagleg leiar Jørgen Jorde i Windafjord Port oppfattar Ødegård byggesøknaden som eit startskot mot fase 2 og 3 frå selskapet si side.

— Me har ikkje dårleg tid om me berre tenker på fase 1, sa Ødegård, som tolka hastverket som sikta inn mot ønske om å bli med på havvindeventyr i fase 2 og 3.

Hortman var veldig tydeleg på at dette berre handlar om fase 1. Haugen og Opheim omtala det som skal skje dersom byggeløyvet blir realisert som ei verdiauke på eit allereie regulert område.

Fekk nytt løyve

Bakgrunnen for saka er at Dommersnes AS/Windafjord Port fekk byggjeløyve for gjennomføring av fase 1 av ei trinnvis utbygging av industriområdet på Dommersnes i Vikebygd 15. november 2023. Denne delen av utbygginga omhandla utsprenging av eit samla område på 54 dekar innanfor det tidlegare nytta området på Dommersnes. Vedtaket om byggjeløyve blei påklaga av mellom anna Statsforvaltaren i Rogaland.

Vindafjord kommune har på bakgrunn av klageprosessen valt å endre det tidlegare gjevne byggjeløyvet, og fatta eit nytt vedtak om byggeløyve der det er sett vilkår til gjennomføringa av tiltaket 15. mars. Den gongen fortalde dagleg leiar Jørgen Jorde at vilkåra i hovudsak er svar på Statsforvaltaren i Rogaland sin klage på det førre byggeløyvet og at desse er innarbeida av Norconsult i dei justerte planane. Konfrontert med vedtaket i DUK seier han at selskapet synest det er godt å få avklaringer i denne saka.

Meir om løyvet og vilkåra:

Foreininga Bevar Ålfjordens Perle har tidlegare varsla at dei er villige til å ta Vindafjord kommune til retten dersom byggeløyvet for fase 1 blei oppretthaldt. Dei har engasjert Sturla Vik-Vestly frå Advokatfirmaet Responsa AS som juridisk bistand. Hovudbodskapen frå foreininga og advokaten har vore at løyvet baserer seg på ein reguleringsplan frå 1980 som dei ser på som gått ut på dato. Styreleiar Jon Magne Svendsbøe i Bevar Ålfjordens Perle omtala DUK sitt vedtak som skuffande, men ikkje veldig uventa.

— Kommunen vil med andre ord ikkje gå inn i den juridiske materien. Det får me håpe at uavhengig instans hjå Statsforvaltaren vil gjere, fortel Svendsbøe.

Fase 1 er første steg i planane om utvikling av industriområdet på Dommersnes til potensiell serieproduksjon til havvindnæringa. Fase 2 legg opp til å ta enda meir areal i bruk, mens fase 3 vil krevje alle dei over 500 måla som regulerte til industri og at Vikevegen blir lagt om. For fase 2 og 3 er det starta ein prosess med ny reguleringsplan.