Omega 365 har signert ny rammeavtale
Omega 365 Consulting AS i Ølensvåg har signert ein ny rammeavtale med Vår Energi ASA. I praksis er dette forlenging av ein eksisterande avtale. Avtalen gjeld levering av prosjektpersonell til drifta til Vår Energi på norsk sokkel.
Det er i ei pressemelding frå Ølensvåg-verksemda Omega 365 Consulting AS at dette blir informert.
Vår Energi ASA er eit av dei større olje- og gasselskapa som opererer på norsk sokkel. Vår Energi blei grunnlagt i 2018 då italienske Eni og norske Point Resources slo seg saman.
Annonse
Fem år
Den forlenga rammeavtalen tok til i 2020, og gjeld nå i nye fem år frå 1. november 2025. I avtalen ligg i tillegg tre opsjonar som kan føra til forlenging, kvar på to år. Dermed kan dette kan bli ein avtale som vil gjelda i elleve år.
— Me ser fram til å vidareføra samarbeidet med Vår Energi. Etter fleire år med gode erfaringar kjenner me kvarandre godt, og det gjer at me raskt finn løysingane som fungerer best i prosjekta, seier Pablo Tveita, avdelingsleiar i Omega 365 Consulting med kontorstad i Ølensvåg.
Spesialistar
Annonse
Det er ikkje minst innan prosjektleiing, ingeniørfag, planlegging og tekniske støttefunksjonar at Omega skal bidra.
Avtalen legg til rette for vidare utvikling av sterke fagmiljø i tett samarbeid. I pressemeldinga heiter det at begge partar deler ambisjonar om å bidra med kompetanse og teknologi som gir trygg, effektiv og framtidsretta energiproduksjon på norsk sokkel.
Kjersti Jondal Thorsen, Kristin Jæger og Pablo Tveita har vore sentrale frå Omega 365 Consulting i arbeidet med forlenginga av rammeavtalen.
Det etablerte samarbeidet frå 2020 mellom selskapa, har vakse seg sterkare gjennom oppfølging og felles forståing av krava i energisektoren.
— Vår Energi, med verksemd både i Nordsjøen, Norskehavet og Barentshavet, er ein profesjonell og framoverlent aktør med høge forventingar til leverandørane sine, seier Tveita.
Omega 365 Consulting AS har meir enn tusen tilsette. Dei er dermed ein stor og intergrert del av Omega 365-konsernet som totalt har over 2.300 tilsette over heile verda. Dei tre hovedområda er programvare, konsulenttenester og subsea, kor selskapet er med i prosjekta frå planfasen til gjennomføringa.
