Nytt helsetilbod i sentrum

Allereie i januar signerte ho kontrakt med husverten på lokala ho leiger i Etne sentrum, og etter litt oppussing var ho klar for å ta i mot sin første kunde månaden etter.

— Det har i grunnen gått slag i slag, og då eg annonserte at eg var klar for å ta i mot kundar, gjekk det berre eit par dagar før eg var i gang med behandlinga, seier Caroline Markhus Svan, som er oppvaksen på Sørstranda.

Då ho var ferdig utdanna innan hudpleie, tok ho over ein salong i Etne, men avslutta her som 19-åring for å verva seg til Forsvaret. Etter det har ho tatt påbygg, og jobba litt av og på innan bransjen sidan den gong. I fjor bestemte ho seg for å satsa fullt og heilt på dette, og bestemte seg for å starta for seg sjølv.