Ein ny olje er godkjent og kan brukast i fiskefôr i Noreg. På biletet er det heilt vanleg rapsolje t.v. og fiskeolje.
Foto: Helge Skodvin.
Ny olje gir betre oppdrettslaks
Nofima har forska på ein ny fiskeolje som gir meir omega-3, betre pigmentering og færre mørke flekkar. Mattilsynet har no godkjent oljen for bruk i fiskefôr.
– Mattilsynet har godkjent olje som kjem frå genmodifisert canola slik at oljen kan brukast i fôret til oppdrettslaks. Planten produserer marine omega-3-feittsyrer. Det er fleire års forsking i samarbeid med industrien som har ført til at vi har komme så langt, seier seniorforskar hos Nofima, Bente Ruyter.
– Det er gjort forsking gjennom mange år for å sjå om denne oljen er eigna i fiskefôr, seier ho.
Forskarane har funne ut at det er han, og no har altså Mattilsynet sett godkjentstempel på han.
I år 2000 utgjorde fiskeolje rundt 30 prosent av fôret til laksen. I 2020 var andelen nede i ti prosent.
– Forskinga vår har vist at det ikkje er sunt for laksen å gå så lågt. Den blir mindre robust og kjøtet får dårlegare farge. Ergo har næringa byrja å auke nivået av omega-3-feittsyrer i fôret igjen, fortel ho.
