Millionsatsing på barna sine uteområde

Dette kom fram då fellesbudsjettet blei presentert i eit formannskapsmøte tysdag. Alle dei sju partia i kommunestyret i Vindafjord er med på eit felles budsjett for 2026 og økonomiplan for 2026-2029.

Viktig for barn og tilsette

Standarden har vore at det blir brukt 500.000 kroner i året på uteanlegg i barnehagar og skular i Vindafjord, noko forslaget til kommunedirektør Yngve Folven Bergesen også la opp til. Nokre år har det blitt lagt på meir pengar, og politikarane sørgjer for at 2026 blir eit slikt år, før ein går tilbake til 500.000 kroner i 2027, 2028 og 2029.

Nina Karin Ramsfjell (Sp) gler seg over at dei fann høve til å gi meir til uteområda i kommunen neste år. Ho trur at ein kan få endå meir for pengane enn summen på 2,5 millionar skulle tilseie.

— Dette kan bli til meir gjennom prosjekt som utløyser spelemidlar og dugnadsinnsats, sa Ramsfjell.

Øyvind Valen (Ap) slo fast at uteområda på skular og barnehagar er viktige for barna, men også for dei tilsette.

Leseløft

Barn og unge er sentrale i fleire satsingsområde for lokalpolitikarane. Dei vil ha eit leseløft i skule og barnehage, der det blir lagt til rette for at dei tilsette får høve til å bruke kompetansen sin. I dette leseløftet skal bruken av digitale og tradisjonelle læremiddel bli balansert ut frå dagens kunnskap. Skulebiblioteka skal ha ei viktig rolle på skulane i kommunen.

Kommunestyret vel å ikkje kutte opningstida i barnehagar og skulefritidsordninga (SFO) eller avvikle ferietilbodet på SFO. Dei vidarefører òg støtta til frivilligheita på nivået dei la opp til i førre budsjett.