Medborgarskap på timeplanen

— Kva heiter de? spurde elevane nysgjerrig.

— Can you repeat that? svara ein av dei vaksne frå norskopplæringa unnskyldande.

— Ja, så klart! svara elevane, og roa tempoet på snakkinga for å gjere seg lettare forstått.

Me er på språkkafé saman med 35 framandspråklege og om lag 40 elevar frå andre klasse idrettsfag og studiespesialisering på Ølen vidaregåande skule. Det surrar i stemmer på mange språk.

Det blir samtala om familie, hobbyar og mykje anna. Med hjelp av både norsk og engelsk, og eit par repetisjonar, flaut samtalen godt. Smil og latter breidde seg raskt.

Torsdag 9. november hadde lærar Ståle Berge saman med VG2-elevane teke over ansvaret for norskopplæringa for framandspråklege, og organisert ein kjekk dag for både elevar og vaksne.

Målet med språkkaféen er å bruka norsk i praksis. Då får våre nye innbyggjarar både sosialisert seg, og øvd seg på å snakke og forstå norsk.

Ein av dei vaksne frå språkopplæringa var Nancy Waithira (40) frå Kenya. Nancy har gått på vaksenopplæring i rundt 2 månadar, og ho fortel at ho synest det er interessant å lære forskjellen på nynorsk og bokmål, og på dei ulike dialektane i området.

— Å gå på språkkafé har hjelpt meg å forstå korleis dei lokale snakkar, fordi det å lære frå bøker er ulikt frå det å faktisk bruke språket, forklarar Nancy engasjert.

Ho fortel at ein må snakke med både unge og gamle for å lære språket skikkeleg, då dei ulike generasjonane bruker ulike ord og uttrykk.

Språkkafeen var populær både blant elevar og vaksne. Ein av elevane som var med på språkkafeen var Oliwia Tomaszewska (17).

— Det har vore heilt fantastisk å bli kjent med dei! Dei var koselege, fortel ho blidt.

Då ho vart spurt om ho kunne tenkt seg å delta på språkkafé igjen, svara ho absolutt» med eit stort smil om munnen.

Me fekk også høyre om korleis det var for Fatima Alagho (25) å kome til Noreg frå Syria.

— Norsk var vanskeleg det første året, men er ikkje vanskeleg nå lenger, seier ho medan ho smiler.

— Det vanskelegaste er grammatikken. I tillegg til norsk lærer eg meg engelsk i Haugesund, fortel Fatima.

Elles likar ho å bruke fritida på matlaging og å gå på tur.

Ein av elevane som fekk moglegheita til å bli betre kjend med Fatima var Stina Heggebø Tveita (17).

— Kva det viktigaste du har lært? spør vi ho.

— Det må vera at det er viktig å tilpasse seg kvar enkelt for at alle skal føle seg respektert, uansett kva bakgrunn dei har, svarer Stina.