Marius (19) er lærling i gjenvinning

Etter to år på vidaregåande skule med VG 1 teknologi-og industrifag og VG2 industriteknologi på studieplanen kunne Marius Mala frå Odda ta fatt på to års læretid ved Haugaland Interkommunale Miljøverk (HIM) i fagområdet gjenvinningsfag.

Til hausten er han klar for å fagprøven, og når den er bestått har han ei mengd ulike yrkesvegar å velja mellom. Gjenvinningsfaget gir opplæring i fagområde som kundebehandling, avfallssortering, gjenbruk, drift av deponi, farleg avfall, kompostering, vedlikehald av utstyr og mottakskontroll på miljøstasjonar. I tillegg får lærlingane opplæring i bruk av ulike typar maskiner, og kan sikra seg sertifikat i mellom anna bruk av lift, truck, hjullastar og gravemaskin.

— Eg er glad for å vera her. Dette faget vil eg anbefala til andre. Her får eg mykje kompetanse og når er eg ferdig har eg mange moglegheiter, seier Marius Mala og stortrivst som lærling ved HIM sin miljøstasjon på Toraneset.

Planen etter vidaregåande var å bli sveisar, men etter snart to år som lærling i gjenvinningsfaget er han ikkje i tvil. Han har valt rett.

– Eg hadde eigentleg takka ja til sveisefag og hadde Toraneset som nummer to. Så fann eg ut at eg ville prøva gjenvinningsfaget. Det er eit breitt fagfelt og her får eg også sertifikat på ulike maskinar, seier han nøgd.

Maskinførar

I løpet av læretida har han mellom anna sikra seg førarbevis på anleggsmaskin og når fagbrevet er vel i hamn håpar han på jobb som gravemaskinførar.

— Eg lærte å køyra maskin her og har falle for dette med maskinar. Og eg har kjøpt min eigen gravemaskin. Eg blir nok gravemaskinførar, seier Mala.

Om Toraneset blir fast arbeidsplass for oddabuen i åra som kjem er uvisst, men med kompetansen han har tileigna seg som lærling i gjenvinningsfaget står mange dører opne.

— Eg er sikra jobb, seier han.

Ein ressurs

HIM har hatt lærlingar i gjenvinningsfaget ved Toraneset i over 10 år, og har kvart år to lærlingar i bedrifta. Læretida deler lærlingane mellom Toraneset og Årabrot, i tillegg til nokre turar innom miljøstasjonen i Etne. Toraneset har tett samarbeid med Opplæringskontoret Rogaland og med jamne mellomrom møtest lærlingane til gruppesamlingar i regi av opplæringskontoret.

— Elevane får sertifikat gjennom samarbeid med opplæringskontoret. Me har laga ein pakke til lærlingane slik at dei kan vera klar til å ta del i drifta, seier arbeidsleiar og lærlingansvarleg ved Toraneset, Håvard Kallestadbakken.

I løpet av læretida er lærlingane innom alle fagfelt som er knytt til utdanninga og noko av det første dei får læra er å betena maskinene.

— Lærlingane blir fort ein ressurs i bedrifta. Det er ein stor fordel at lærlingane kan få alle sertifikat her, seier han.

I tillegg til ansvar for lærlingane er Kallestadbakken sensor for elevar i gjenvinningsfaget.

Toraneset Miljøpark

Ved Toraneset Miljøpark kan både private og bedrifter levera avfall. Her handterer dei alle typar avfall enten det er bygningsrestar, betongavfall, elektrisk avfall eller vanleg hushaldningsavfall. Spesialavfall som asbest, maling, ugrasmiddel og liknande kan også leverast til mottaket, men er det snakk om svært farleg avfall blir det sendt vidare.

For å sikra at avfallet kan handterast på Toraneset blir det tatt prøvar. Blir det klassifisert som farleg avfall skal det sendast til spesialdeponi. Dette er oppgåver lærlingane får ta del i.

Gjenvinningsfaget

Studentar som vel gjenvinningsfaget lærer å gjenvinna brukte og kasserte produkt og råstoff. Fullført og bestått opplæring fører fram til fagbrev med yrkestittel gjenvinningsoperatør.

Ein gjenvinningsoperatør samlar inn, transporterer, sorterer og behandlar avfall. Vanlege arbeidsoppgåver består i å transportere avfall til rett mottak, behandla, komprimera og sortera avfallet etter gjeldande regelverk, og handtera og klargjera avfallet for vidarebehandling eller sluttbehandling. Gjenvinningsoperatøren skal også rettleie kundar og leverandørar om gjenvinning, avfallsredusering og sortering. Registrering og rapportering av avvik frå rutinar høyrer også med til jobben.

Yrket krev fagkunnskap om mellom anna dei tekniske og miljøfarlege sidene ved jobben og det krevst jamnleg oppdatering av kunnskap.