Klare for å skape liv
Laurdag ønskjer Vikebygd Revy og Teater velkommen til to rundar med førestillinga Gir gass. Styreleiar Rolf-Jørgen Julsrud gler seg til at bygda skal få sjå 12 lokale skodespelarar by på seg sjølv.
— Dette er eit årleg høgdepunkt me ser fram til, seier styreleiar Rolf-Jørgen Julsrud i Vikebygd Revy og Teater.
På dagen blir det ei førestilling med kafé driven av teaterlaget. Når kvelden kjem, blir det ei ny førestilling som blir etterfølgd av ein dans med pub og livemusikk frå lokale artistar i bandet Klubb’n, i regi av Vikebygd IL.
Annonse
Lokal forankring
Revyen er den fjerde i rekka for laget, som blei stifta i 2017. Alle skodespelarane bur i Vikebygd. Seks av dei har vore med på alle revyane, medan nokre medverkar for første gong. Aldersspennet på scenen går frå 17 år til godt opp i åra. Julsrud understrekar at det òg ligg ein stor dugnadsinnsats bak scenen og på arrangementsida.
Revyen er den fjerde i rekka for laget, som blei stifta i 2017. Alle skodespelarane bur i Vikebygd. Seks av dei har vore med på alle revyane, medan nokre medverkar for første gong. Aldersspennet på scenen går frå 17 år til godt opp i åra. Julsrud understrekar at det òg ligg ein stor dugnadsinnsats bak scenen og på arrangementsida.
Tor Arild Mortveit er regissør for fjerde gong, medan Alice Frøvik er revysjef for første gong. Nytt av året er live musikk med hjelp frå Jostein Sørhaug.
Annonse
— Publikum kan vente seg god, gammaldags bygderevy med humor, uhøgtid, latter, song og lokale profilar, seier styreleiaren.
Håpar på fullt hus
Vikebygd Revy og Teater har hatt teater og andre arrangement i åra mellom revyane. I fjor arrangerte dei Bygdemeister, ein lokal versjon av TV-programmet Kongen befaler.
— Me prøver å få til ting med lokal profil og vere eit lokalt kulturtilbod som skapar liv og røre i Vikebygd, seier Julsrud.
Julsrud stifta laget. Han har vore med på amatørteater før han flytta til Vikebygd. I likskap med i Vikebygd jobba han bak scena der. Prosessen fram mot årets revy har vore lang.
— Ideen kom i fjor, så laga me ei skrivegruppe som har jobba gjennom vinteren, og så starta me med øvingar i august–september. No er siste innspurt denne veka. Øvingane har vore stort sett kvar kveld. Generalprøve er fredag før dei to førestillingane laurdag, fortel styreleiaren.
Annonse
Han satsar på fullt hus på kveldsførestillinga slik som tidlegare år. For dei som ikkje vil på festen etterpå ser han dagsførestillinga med kafé som eit koseleg alternativ.
Spurt om kva revyen betyr for Vikebygd som bygd, svarar Julsrud at han håpar at den kan fungere som ein samlingsarena. Han har òg store forhåpningar til klubbkvelden.
— Det blir full gass! Med levande musikk, pub og dans blir det ein skikkeleg møteplass, avsluttar Julsrud.
