Klar for å byggje sentrumsleilegheiter

— Det viser seg at det er stort behov for moderne sentrumsbustadar som tilfredsstiller krava – lettstelte bustadar med universell utforming. Kommunen har snakka om behovet for fortetting av sentrum, så eg trur me treff blink med prosjektet vårt, seier dagleg leiar Rinats Nikitins i Stilrent Bygg.

I tillegg til Stilrent Bygg er han dagleg leiar og majoritetseigar i Haugaland Eiendomsselskap AS, som kjøpte dei aktuelle tomtene i Litlehagen tidleg i 2025.

Lettstelt

Området har sidan 2000 vore regulert til frittliggande einebustadar, men til eit formannskapsmøte tysdag innstiller kommunedirektør Yngve Folven Bergesen på eit vedtak om å endre reguleringa til konsentrert busetnad med tilhøyrande anlegg, og slik leggje til rette for leilegheitsprosjektet til Stilrent Bygg. Nikitins er glad for dette og synest selskapet har hatt god dialog med kommunen gjennom heile prosessen.

Leilegheitene skal vere lettstelte med universell utforming. Alt er på eitt plan, og det er lite vedlikehaldsbehov. Storleiken på dei blir rundt 60 kvadratmeter. Leilegheitene vil innehalde to romslege soverom, moderne bad, open stove- og kjøkkenløysing, skjermd uteplass både framme og bak, solrike terrassar, carport og eiga sportsbod rett utanfor døra. Leilegheitene får varme frå vassboren varme.

— Me ser ein etterspurnad etter litt mindre einingar. Vanlege einebustadar er såpass dyre i dag at færre har råd, fortel Nikitins.

Utviklar sentrum

Med Litlehagen-prosjektet har Stilrent Bygg tenkt på vaksne folk som vil flytte nærare sentrum og alle fasilitetane der, samt yngre, gjerne einslege, som har utfordringar med å kome inn på bustadmarknaden. Den daglege leiaren håpar dei treff innanfor rett budsjett for folk som ikkje treng dei heilt store bustadane.

— Leilegheitene er tilpassa eit komfortabelt liv med minst mogleg vedlikehald, seier han.

Området har gangavstand til skular, barnehage, idrettsanlegg, helse- og kommunefunksjonar og sentrum. Vindafjord kommune har lenge hatt fokus på at den demografiske utviklinga skapar behov for fleire lettstelte bustadar nær sentrum i bygdene, spesielt Ølen, slik at flest mogleg kan bu heime lengst mogleg, helst heile livet. I eit formannskapsmøte nyleg uttala rådgjevar Anne Sofie Sandvik for FDU-investeringsprosjekt at det er behov for 400 leilegheiter i Vindafjord innan 2040, derav 120 i Ølen.

Les også:

Held sjukeheimsmoglegheitene opne

Stilrent Bygg har bidratt til utviklinga av kommunesenteret tidlegare, mellom anna med å byggje bustadar på Roa-feltet. I tillegg til Litlehagen-prosjektet har dei planar om eit signalbygg dei har døypt Gullkanten i Mulagata. Nikitins fortel at dei framleis jobbar med arkitekt og regulering. Dei fekk tilbakemelding frå teknisk avdeling i kommunen som ønska nokre avklaringar.

— No jobbar me med underleverandørar for å få prisane ned – me såg at marknaden ikkje var klar for prisane me hadde – så me jobbar for å senke kostnadane. Prosjektet kjem for sal igjen når me har alt på plass, seier den daglege leiaren.

Snart byggjestart

Planforslaget til Litlehagen-prosjektet er utarbeidd av Arkipelet AS. Dei sendte fyrst planforslaget direkte på høyring til naboar og berørte offentlege myndigheiter 26. mai. I høyringa dukka det opp forhold som medførte behov for endringar av planforslaget. Det blei derfor sendt ut nytt brev 18. august. Planforslaget blei nedjustert» frå seks til fem bueiningar og frå to til ein etasje. I høyringsperioden kom det inn seks merknadar.

Dersom det blir politisk fleirtal for omregulering, går ting framover. Nikitins opplyser at kontrakt på grunnarbeid er signert, og at dei kan rekkje byggestart i år. Dei treng to sal før dei kan starte bygginga.

— Me må avklare dei siste kostnadsestimata først, så kjem leilegheitene for sal etter at me har rammeløyve, seier Nikitins.

Erfaringa deira viser at slike byggjeprosjekt tek cirka 12 månader, og at ein i tidlegaste fall kan klare innflytting innan jula 2026.

Marginale nedsider

I si saksutgreiing til formannskapsmøte tysdag er kommunedirektør Yngve Folven Bergesen gjennomgåande positiv til å gjere den nødvendige omreguleringa. I ei avslutande samla vurdering skriv han:

Dei positive verknadene av planforslaget er at det opnar for nye bustadar sentralt i Ølen. Det kan bli eit tilbod om mindre husvære som kan vere eit særskilt tilbod for kjøpargrupper som vil inn på bustadmarknaden. Bustadområdet har tilfredsstillande solforhold, og bustadane ligg i gangavstand til sentrumsfunksjonar og til friluftsområde/turvegar. Det bygger opp under ei utvikling med lågare transportbehov til daglege gjeremål, som igjen kan bidra positivt på folkehelsa.

Negative verknader av planforslaget er marginale. Det er tatt omsyn til byggehøgde for ikkje å vere til sjenanse for bakanforliggande bustad. Trafikkavviklinga i Litlehagen er vurdert i samband med planarbeidet for Ølen idrettsområdet, og trafikken som 5-mannsbustadane tilfører, vil vere marginal. Det vil likevel vere avgjerande å skape så gode tilhøve som mogleg for mjuke trafikantar i området, særskilt med fortausløysing, kryssingspunkt og lyssetting av desse.»