Ruben Doblas Gundersen (25) har 12 millionar abonnentar på YouTube, er superkjendis i Spania, Mexico, Argentina, Peru og Chile og kan ikkje gå på gata i heimbyen Madrid utan å bli stoppa. Derfor er det godt å komma på besøk til besten på Fjæra. Her finn han kvilepulsen.
Foto: Grethe Hopland Ravn
I fred for hysteriet
Ruben Doblas Gundersen (25) nyt livet og den rolege atmosfæren på Fjæra, for til kvardags heime i Madrid er han blitt ein superkjendis som ikkje kan handle mjølka si sjølv på nærbutikken ein gong.
På ein benk ved drivhusveggen hos besten på Fjæra i Etne sit Ruben Doblas Gundersen i saman med mor Bente Teigen Gundersen og veslesyster Liv Hilde på fem år. Rundt dei summar både fluger og veps, men den overdøyvande lyden av motorisert plenkløppar bankar hardast i trommehinnene. Far og ektefelle Hector har sin plenklyppardebut og der ser ut til at han skulle ønskja plenen var dobbelt så stor, for det er ein ny og spennande jobb han har fått tildelt.
— Eg elskar å vera på Fjæra, og det blir viktigare og viktigare for meg for kvart år. Eg finn roen hos besten og eg har vore på besøk kvart einaste år sidan eg blei fødd, seier Ruben som til dagleg lever eit heilt anna liv i heimbyen Madrid i Spania.
