Mette-Marit til NRK om Epstein-kontakten: – Eg vart manipulert og lurt

Kronprinsessa opnar opp om kontakten ho hadde med den skandaleomsuste milliardæren i eit intervju med NRK, som vart publisert tidleg fredag morgon.

– Eg skulle sjølvsagt ønskje at eg aldri hadde møtt han, seier ho i starten av det nær 21 minutt lange intervjuet.

– Eg kjenner meg så manipulert. Og når ein blir manipulert, skjønner ein det jo ikkje frå starten av. Det er informasjon som kjem til deg på ulike tidspunkt. Eg trur nok eg i større grad i dag ser kor manipulert eg vart. Det er klart det tek tid å prosessere. Men det var jo ein del hendingar som gjorde at eg tenkte «dette er ikke bra», seier kronprinsessa.

– Skulle sjekka nøyare

Jeffrey Epstein var ein dømd seksualforbrytar og amerikansk milliardær. Han døydde i fengsel i 2019 i påvente av ei rettssak der han var tiltalt for menneskehandel.

Kronprinsessa har beklaga at ho ikkje sjekka bakgrunnen hans nøyare, men ho har gjennom fleire veker vore under aukande press om å svare meir utfyllande.

– Det er utruleg viktig for meg å ta ansvar for at eg ikkje sjekka bakgrunnen hans nøyare, og ta ansvar for at eg vart såpass manipulert og lurt.

Ho seier det er viktig for henne å presisere at det ikkje er synd på henne sjølv i denne situasjonen.

– Det er jo alle offera som har vorte utsette for dei grove overgrepa, som fortener rettferd. Det kjenner eg eit så stort sinne for at dei ikkje har fått. Samtidig er det viktig for meg å seie at om eg har gjort noko som har bidrege til å gi han legitimitet på noko vis, er jo det forferdeleg vanskeleg for meg, sjølvsagt, seier ho.

Visste ikkje at han var ein overgripar

Særleg éin av e-postane i Epstein-filene har fått mykje merksemd, nemleg denne frå oktober 2011, fleire år etter han vart dømd for overgrep.

«Googlet deg etter forrige epost. Enig, det så ikke bra ut :)», skreiv kronprinsessa i ein e-post til Epstein.

– Kva var det kronprinsessa googla, og kva var det som ikkje såg bra ut?

– Det veit eg ikkje. Eg hugsar ikkje, det er 15 år sidan. Det er vanskeleg for meg å vite.

Kronprinsessa seier samtidig at ho har brukt veldig mykje tid på å prøve å finne ut av konteksten, men utan å få nokon gode svar:

– Eg skulle ønskje at eg hadde resten av den e-postkorrespondansen. Eg veit ikkje kva eg fann, og eg veit ikkje om det var informasjon han hadde bede meg om å google. Eg skulle ønskje eg hadde hugsa kva det var, det hadde sannsynlegvis gjort livet mitt litt lettare no.

– Men hadde eg funne informasjon som gjorde at eg skjønte at han var ein overgripar og seksualforbrytar, så hadde eg jo ikkje skrive smilefjes bak.

Beskriv han som venn

Mette-Marit beskriv i NRK-intervjuet forholdet sitt til Epstein som vennskapeleg og avviser at det var noko romantisk mellom dei.

– Han var ein venn av ein venn av meg, først og fremst. Viss spørsmålet ditt var om forholdet hadde ein annan karakter, er svaret nei, seier ho.

Ho avviser at tonen i e-postane mellom dei to som har komme ut, er intim.

– Eg opplever det ikkje sånn. Eg opplever det meir som ein kameratsleg tone, seier ho.

Kronprinsessa vart også spurd om ein annan e-post ho sende Epstein. Den kom etter at milliardæren sa at han var på konejakt:

«Paris er bra for utroskap. Skandinaver er bedre konemateriale. Men samtidig, hva vet vel jeg?»

– Det er ein «banter» mellom venner. Det er ikkje noko spesielt med den. Det er ein kameratsleg tone, og så er det sleivete.

– Sjukdommen avgjer

Parallelt med at svara har late vente på seg, har oppslutninga om monarkiet og kronprinsessa vorte svekt.

Berre seks av ti oppgav at dei støtta monarkiet som styreform i ei undersøking NRK fekk gjennomført i februar. I ei undersøking for Nettavisen svarte 45 prosent at dei meinte Mette-Marit var ueigna til å bli dronning.

– Eg lever med ein alvorleg sjukdom, og det er den som pregar kvardagane mine no. Det er den som avgjer om eg i det heile kan stå i rolla mi eller ikkje, seier Mette-Marit på spørsmål om framtida.

Kronprins Haakon seier i intervjuet at han kjende til kontakten mellom Epstein og Mette-Marit, og at han oppfatta at ho braut kontakten med han då ho kjende ho vart utnytta.

– Vil alltid ha Mette på laget

Kronprinsparet adresserer også framtida i intervjuet:

– Men eg har veldig stor tru på kva monarkiet betyr i Noreg. Og eg har veldig stor tru på at tillit er ein av dei finaste verdiane ved samfunnet vårt. Eg håpar jo verkeleg at dette over tid ikkje svekkjer tilliten til institusjonen. Det ville vore veldig trist for meg, seier kronprinsessa.

– Vi står jo på eit fundament. Vi har vore saman i over 25 år no. Og då har vi heldigvis kunna byggje det sånn at vi står støtt saman. Og når ein giftar seg, er det jo for gode og vonde dagar, seier kronprins Haakon.

– Og så er det sånn at Mette er omsorgsfull, klok og skikkeleg sterk. Derfor vil eg alltid ha henne på laget viss noko vanskeleg skjer.

Ringde kronprinsen etter episode

Kronprinsessa kom i kontakt med Epstein første gong i 2011. Det var tre år etter at han var dømd for kjøp av seksuelle tenester frå ei mindreårig jente og hallikverksemd.

I Epstein-dokumenta er kronprinsessa nemnd mange hundre gonger. Omfanget av kontakten med Epstein var langt større enn ho tidlegare hadde gitt inntrykk av. Tonen i dialogen har også vekt oppsikt og er av mange beskrivne som nær, spøkefull og fortruleg.

Kronprinsessa møtte også Epstein fleire gonger. Ho avslutta kontakten sommaren 2014. Slottet har opplyst at det skjedde fordi ho opplevde at han utnytta sambandet mellom dei. I intervjuet fortel ho om ein episode same år i Epsteins bustad i Palm Beach, der ho kjende seg såpass utrygg at ho etterpå ringde heim til kronprinsen.

– Men eg hadde kontakt med han ei god stund etter det. Det trur eg nok var fordi han var såpass manipulerande, at han brukte det at vi hadde ein felles venn. At eg er godtruande. Eg likar å tru det beste om folk, men eg valde også å avslutte kontakten med han. Det var på grunn av slike episodar.