Rekoringen - Direkte handel med lokalmat

På parkeringsplassen står produsentane klare med kassar, posar og kjøleboksar. Kundane kjem innom ein etter ein, seier namnet sitt og får overlevert varene dei har bestilt. Utleveringa går raskt. Nokre stoppar berre i eit par minutt før dei køyrer vidare, mens andre tar seg tid til ein kort prat med produsentane. Denne tysdagen i mars, er Atle Aas ein av kundane i Etne. Han har bestilt varer frå fleire produsentar, og kan fornøgd legga både egg frå Mette Vatland i Suldal, kjøt frå Inger-Norunn Hamre og Kari-garden, og brød frå Lars Berner Rødne frå Skillingsbakeriet i bagasjerommet på bilen sin.

— Det er veldig kjekt at det finst slike moglegheiter, og at ein kan handla direkte hos leverandøren, seier Aas.

Han fortel at familien ofte bestiller noko når det er utlevering i REKO-ringen.