Torbjørn Aarak Grønstad har investert i både rådgjevarar og gentesting for å kunna avla fram gode kalvar. Det har gitt resultat.
Grethe Hopland Ravn
Landbruk
Avla fram superstut - kan bli far til 6.000
Det luktar silo og varm mjølk i fjøset hos
Torbjørn Aarak Grønstad – på Grønstad i Etne. Garden heitte frå gamalt av Skjeldal,
og inne i fjøset får ei 3,5 år gamal ku smaka på det gode fôret som bonden byr
på. Kua er mor til ein heilt spesiell kalv, nemleg stuten «12504 NR Skjeldal-PP», men han skal me koma tilbake til. Om litt.
I fjøset går roboten jamt, kyr kjem og går, og
kvardagen følgjer eit mønster som er både fast og krevjande. Her, midt i det
som for utanforståande kan sjå ut som rutine, blir det tatt val som påverkar
generasjonar framover. Rundt 55 kyr kalvar i løpet av året. Totalt er det opp
mot 130–140 dyr på garden, og mellom 30 og 35 oksar blir fôra fram kvart år.
Dei fleste lever stille liv som produksjonsdyr. Men éin av kalvane bar på noko
meir: Usedvanleg gode gener.
