Redaktør Torstein Tysvær Nymoen går frå Grannar til Haugaland Vekst.
FOTO: SVEIN-ERIK LARSEN
Grannar-redaktøren har fått ny jobb
Torstein Tysvær Nymoen (50) har sagt opp stillinga som ansvarleg redaktør i Grannar. Han lovar å hugse på Etne og Vindafjord i sin komande jobb som kommunikasjonsrådgjevar i Haugaland Vekst.
— Eg håpar eg har vore med på å setje ein fornuftig kurs for det Grannar bør vere i ei moderne medietid, seier Torstein Tysvær Nymoen.
Det er usikkert nøyaktig når han skal slutte, men med seks månader oppseiingstid blir det seinast ved utgangen av april 2025. Tysvær Nymoen kom frå redaktørstillinga i Vestavind i mars 2023 og var òg journalist i Grannar mellom 2015 og 2021.
I Haugaland Vekst skal han bli kommunikasjonsrådgivar. Det interkommunale selskapet fyller 20 år i 2024 og utfører regionalt nærings- og utviklingsarbeid for eigarkommunane Bokn, Etne, Haugesund, Karmøy, Sauda, Sveio, Tysvær, Vindafjord og Utsira, samt Rogaland fylkeskommune.
