Gir firbeinte betre liv

Klokka er tolv på dagen, og dyreterapeut Kari Bødtker tar imot dagens første kunde – ein liten chihuahua med ein hofteskade som er operert. Mini får massasje og laserbehandling, før turen går i vasstredemølla for styrketrening.

— Me merkar så stor forskjell etter at me begynte her. Nå går me turar, og han hoppar og sprett. Slik var det ikkje før, seier eigar Gunn Anita Jagtvik.

Etter Mini kjem malamuttblandinga Amok inn for behandling. Han har gått til behandling i over eitt år, og er blitt veldig glad i å gå på vasstredemeølla. Han har hoftedysplasi som han fekk mykje plager av. Nå er han mykje betre og sterkare.

— Travelt

For Bødtker handlar kvardagen om å gi firbeinte eit betre liv – og å driva ei verksemd som byggjer på fagkunnskap, erfaring og ekte interesse.

— Det er travelt, men givande og spennande, seier ho.

Etter fleire år bak rattet på tungtransport måtte ho leggja om på grunn av ein skade. Interessa for hund førte henne til Nordisk Heste- og Hundeterapiskole, der ho tok utdanning som hunde- og kattemassør, laserterapeut og rehabiliteringsterapeut.

— Det sa seg sjølv at om eg skulle jobba med dette, måtte eg starta noko sjølv, fortel ho.

Ho opna klinikken sin i fjor, og flytta inn i lokala ved Karmsund Dyrehospital tidlegare i år. Her leiger ho seg inn i rehabiliteringsavdelinga som tidlegare blei driven av hospitalet sjølv.

— Eg har fått overveldande positiv respons. Det viser at dette er eit tilbod som har mangla på Haugalandet, seier Bødtker.

Betre og enklare liv

På klinikken møter ho alt frå kvalpar som skal venjast til handtering, til sportshundar, redningshundar og eldre dyr som treng vedlikehaldstrening. Ho samarbeider òg med veterinærar om rehabilitering etter skadar og operasjonar.

— Det er kjekt å kunna hjelpa dyra til eit betre og enklare liv. Nokre gonger kan me prøva rehabilitering før ein operasjon, for å sjå om problemet kan løysast utan inngrep, fortel ho.

Arbeidsdagen hennar er lang, og dei fleste timane går på ettermiddag og kveld.

— Eg startar med å sjekka utstyret og vatnet i tredemølla før kundane kjem. Eg skriv journal, gjer reint etter kvar pasient og avsluttar dagen med kassaoppgjer og utvask før eg køyrer heim til Bjoa – gjerne seint på kvelden, seier ho.

Ho har mykje utstyr, men understrekar at det viktigaste verktøyet er hendene.

— Nokre kjem fordi hunden eller katten er stiv og har vondt i muskulaturen. Då kan massasje vera ein fin måte å få løyst opp det som er vondt og få tilbake eit naturleg rørslemønster, forklarar ho.

Tidenes elev»

Vasstredemølla er eit av dei viktigaste hjelpemidla. Den gir blant anna avlasting for nyopererte dyr og dei med leddproblem, samtidig som den trenar balanse og styrke.

— Og ja, kattar brukar den òg, og dei har faktisk ikkje så mykje imot vatn, smiler ho.

Ho brukar òg laserbehandling for å auka sirkulasjon og dempa smerte, og har eit breitt spekter av kurs og sertifiseringar bak seg.

I år blei ho kåra til tidenes elev» ved Nordisk Heste- og Hundeterapiskole, som feira 20-årsjubileum.

— Det var heilt utruleg kjekt. Frå august er eg òg teken opp som medlærar ved skulen, og har nettforelesingar for elevar annakvar veke, seier ho.

Sjølv om ho no har fullt belegg på klinikken, held ho fram som hundeinstruktør for Nordog Haugesund.

— Det er eigentleg eigaren som treng mest opplæring – ikkje berre hunden, seier ho med eit smil.

Vidare framover vil Bødtker utvikla tilbodet sitt.

— På sikt ønskjer eg å byggja basseng for dyr og utvida til å omfatta hest. Men først skal eg sørgja for at dette held seg lønsamt og at eg kan leva av det, seier ho.