Fiskarsjefen kjem heim
Kåre Heggebø har dei siste fire åra vekependla frå Ølen til Trondheim der han har leia Norges Fiskarlag. Kontrasten blir stor no for han etter å ha brukt heile åremålskvantumet på tolv år. Han går tilbake til fiskaryrket, og spørsmålet er om han får kona over til fiskaryrket nok ein gong.
Dei ti siste åra før han blei nasjonal leiar av fiskarlaget, var kona Karin Fransson Heggebø (64) med som fiskar. Kåre Heggebø (65) har vore fiskar heile sitt liv.
— Rett nok var eg to vintrar tidleg i yrkeslivet på fraktebåt. No skal eg tilbake til fiskaryrket, seier han.
Annonse
Den skuleflinke ølensbuen hadde ikkje tålmod til å gjera seg ferdig med dei tre gymnasåra i det første kullet av det som etter kvart blei Ølen vidaregåande skule. Han visste at han skulle bli fiskar. Leiareigenskapar og administrasjon fekk han bruk for som tillitsvald allereie som 20-åring. Etter åtte år som nestleiar i Norges Fiskarlag, blei han i 2021 vald til heiltidsarbeidande styreleiar i Trondheim.
— Eg har alltid interessert meg for det fiskeripolitiske, men no blir det gradvis slutt med å direkte påverka det, seier han.
Han blir med vidare som styremedlem i FHF, som står for Fiskeri- og havbruksnæringens forskningsfinansiering.
Fiskaren
Annonse
Under åra i Trondheim har han sørga for at han har alle godkjenningar og kvotar som han hadde før han fekk kontor i Havnegata og leilegheit på Solsiden som gav han eit urbant liv i vekene.
— Kvotane mine er fiska opp av leigeskipper som ein del av ein kvotesamarbeidsordning, seier han.
Det er ein kombinasjon av at leigeskipperen delvis har brukt hans båt og utstyr, men det er ikkje krav om det for heile kvota.
— Eg skal fiska i åra som kjem, men det blir nok meir lokalt nå, seier Heggebø, som har vore med fiskebåten sin i absolutt alle fylka med kystlinje i landet.
Fiskeripolitikk
Jobben som styreleiar har til tider vore turbulent. Det er ting han vil sakna, men òg ting han ikkje kjem til å sakna.
Annonse
— Det har vore mange krevjande intervju med pressa, der det har vore viktig å ha tunga beint i munnen. Sakene har typisk vore kontroversielle, og forventningane frå pressa har vore at eg kunne svara på alt der og då, seier han, som med jamne mellomrom har vore i det nasjonale nyheitsbiletet.
Kona fortel om heftige telefonsamtalar, òg i helgene, direkte frå medlemmer i fiskarlaget som ikkje alltid var samd i politikken i enkeltsaker.
Uvant blir det nå at han ikkje i så stor grad kan vera med å påverka rammevilkåra i bransjen sin.
— Stillinga som styreleiar er politisk valgt, og ved sida av meg har eg hatt eit tjuetals administrativt tilsette. Det er ein tilsett generalsekretær i Norges Fiskarlag, Sverre Johansen, og me to samarbeida godt og måtte alltid vera kalibrert, seier han.
Spesielt hyggeleg seier han at det var i april i år då blei invitert til slottsmiddag med følgje. Dette var i samband med eit islands statsbesøk, og følgje blei sjølvsagt kona.
Internasjonalt
Annonse
Tidlegare i månaden uttalte Kåre Heggebø til pressa at posisjonen der marinen si mykje omtalte seinkning av to fregattar ikkje var til å tru. Den eine ligg no på 125 meters djupne i eit aktivt fiskefelt ved Svensgrunnen utanfor Senja.
Interaksjon mellom marinen, andre fiskerinasjonar, EU og styresmaktene har vore naturlege ting Heggebø har vore engasjert i. Direkte kontakt med Russland har det naturlegvis vore lite av i hans fire år som leiar, men er van frå åra som nestleiar med å ha eit konstruktivt forhold til russiske fiskerimyndigheiter.
— Me har vore med som støttespelarar til myndigheitsdelegasjonar i fiskerispørsmål. Når det gjeld havområda våre er dei fleste av slike forhandlingar i London. Klimaet vart endra til det meir krevjande etter britane gjekk ut av EU, seier 65-åringen, som har vore i ein partipolitisk nøytral organisasjon.
Karin og Kåre
Dei traff kvarandre i ungdomstida i Ølen, og i ein tiårsperiode etter at ungane var flytta ut var ho med på fisket med ektemannen på heiltid. Når han no byrjar med fisket att, er ho ikkje heilt så sikker på om ho vil byta ut jobben ho har i rus- og psykiatriomsorga.
— Litt blir eg vel med, men ikkje i så stor grad som tidlegare, seier ho.
Annonse
Karin og Kåre har to søner og to barnebarn. Frank (41) og Kristian (37) bur høvesvis i Stavanger og Oslo. Dei tok begge vegen inn i akademia med lange utdanningar kor dei no arbeider høvesvis som idrettspsykolog for Olympiatoppen og fotballklubben Viking, og som samfunnsvitar og forskar med doktorgrad ved OsloMet. Begge er til tider å høyra og sjå i nyheitsbiletet, og deler i utgangspunktet ikkje interessa for fiske som yrke.
— Dei heva likevel augnebryna då faren ein gong sa at han tenkte å slutta av, noko dei ikkje likte, seier Karin Fransson Heggebø.
Til slutt minner Kåre Heggebø om at fiskeria er grøn verksemd langt inn i evigheita.
