Fekk stjerner til breiddeløp

I løpet sprang deltakarane opp Bjørkebakken, òg kjend som Monsterbakken». T

— Det er jo synd at eg vart såpass sjuk som eg var før løpet. Forma er heilt okei no, så eg skal i alle fall delta, men det vert nok ikkje det eg er kapabel til og ønskjer å springa på, sa Henriksen i forkant av løpet.

Han kom til Skjoldastraumen saman med fleire kollegaer i agentselskapet Player Solution fredag.

— Korleis har de lada opp?

— Me var på fotballcup med Skjold IL laurdag, og har hatt ein roleg føremiddag i dag. No skal alle vera med og springa, seier Henriksen.

Blant anna sprang superagenten Jim Solbakken inn til ein 81. plass. Han er kjend som ein av landets mest innflytingsrike fotballagentar. Henriksen og Nordtveit hadde Solbakken som agent då dei spelte fotball aktivt, og fekk 52 (Nordtveit) og 58 (Henriksen) landskampar. Etter at dei la opp, byrja dei i agentselskapet til Solbakken, som mellom anna har Ole Gunnar Solskjær på klientlista. Ifølgje Transfermarkt har selskapet 111 spelarar i stallen sin, med ein samla marknadsverdi på nesten 160 millionar euro (rett under 1,88 milliardar kroner).

Sjekka løypa med ATV

— Eg og ein kollega køyrde ATV-en til Håvard gjennom løypa i går kveld. Det er ei tung løype med bratte bakkar, så her trur eg du må vera taktisk smart om du skal unngå å stivna heilt. Eg skjønar kvifor ho vert kalla Monsterbakken, for ho såg blytung ut. Du skal vera godt trent om du skal ha ei god tid, sa Henriksen like før løpet.

Etter barneløpet var Henriksen med og delte ut medaljar til alle deltakarane. Mange hadde treft han på fotballskulen til Skjold IL tidlegare, så det var mange som gleda seg til å møta han igjen.

— Kunne ikkje gjort det betre

Fotballprofilane hadde eit stykke opp til dei beste aktive løparane under Sluseløpet. Morten Gjendem gjekk til topps.

— Eg skulle eigentleg vera med på Stavanger maraton førre helg, men måtte droppa det på grunn av ei ankelskade. No ville eg berre testa forma, seier Gjendem, som var fyrstemann over målstreken.

Under årets Sluseløp kom han i mål på tida 14:23. Det er eit stykke unna løyperekorden han sette på den 4,5 kilometer lange traséen for to år sidan (13:45). Gjendem er likevel nøgd med eiga prestasjon.

— Eg hadde ingen jagande bak meg i dag. Men eg pusha godt, og kunne eigentleg ikkje gjort det betre, seier han.

God Stemning

Og det er ein grunn til at Gjendem kjem tilbake til Straumen med jamne mellomrom. Han meiner ramma rundt løpet er veldig bra.

— Eg synest det er kjempekjekt med så mange folk i løypa som skapar god stemning. Folk heiar heile vegen frå start til mål, det betyr mykje, seier han nøgd.

Bak han kom Eirik Renna Eilertsen inn til ein andreplass på 15:34. Tredjeplassen gjekk til Nils Haktor Bua, som runda løypa på 15:38.

Fyrste kvinne over målstreken var Vivian Kyte (19:43). Ho vann òg Stavanger halvmaraton for berre ei veke sidan. Med maratonet enno hengande i beina, gjennomførte ho i dag litt dårlegare enn i fjorårets løp. Men ho er nøgd med eiga innsats.

— Eg hadde god kontroll heile tida, og kjende at eg fekk gjort mitt beste. Og så er det jo alltid så fint vêr her. Kjempegod stemning og masse folk. Eg likar meg godt her, seier Kyte, som skulle rett heim og eta kake og halda bursdagsselskap for dottera.

Sluseløpet sundag var nummer tretten i rekkja. Vêrgudane var i godt humør, og skjenkte både sol og temperatur på opp mot 20 grader til Skjoldastraumen. Eit perfekt utgangspunkt for ein dag med mosjonsløp, barneløp og konkurranseløp.

Vivian Kyte gjekk til topps blant kvinnene. Ingvild Bjørnevik blei nummer to og Ellen Torland Mannes kom på tredjeplass. Foto: Sarah Elise Falkeid/Tysvær Bygdeblad