Dagleg leiar Kari Aakra i Medvind24 Næringshage.
Arkivfoto: Jon Edvardsen
Får pengar til meir nyskaping
Vestland fylkeskommune har inngått samarbeidsavtalar med 11 næringshagar og inkubatorar i fylket. Mellom dei er Medvind24 Næringshage som har kontorar i både Etne og Vindafjord.
– Dette er viktige aktørar i det regionale økosystemet som støttar opp om nyskaping og næringsutvikling. Samarbeidsavtalane med næringshagar og inkubatorar har som mål å utvikle ei meir robust støtte til nyskaping og næringsutvikling i heile fylket, seier Oddmund Klakegg, leiar for hovudutval for næring, i ei pressemelding.
Mobilisering
Målgruppa for ordninga er næringshagar og inkubatorar som er tatt opp i Siva sine nasjonale program og som har Vestland som nedslagsfelt. Ordninga skal gjere innovasjonsselskapa i stand til å ta ei aktiv rolle i det regionale nettverket og bidra til samarbeid og mobilisering for å nå måla Vestland fylkeskommune har vedteke i planen Berekraftig verdiskaping».
Det kom inn søknad frå alle dei 11 aktuelle næringshagane og inkubatorane, og det er no inngått treårige avtaler med alle.
Etter desember 2026 skal ordningane evaluerast. Resultatet frå evalueringane skal leggjast til grunn for om det skal lysast ut ein ny programperiode, og om søknadskriteria skal endrast.
Desse får støtte
Summen viser kor mykje næringshagane og inkubatorane får kvart år.
* Inviro og Stryn næringshage: 700.000 kr
* Næringshageprogrammet i Sogn: 700.000 kr
* Atheno: 800.000 kr
* Industriutvikling vest: 800.000 kr
* Vestlandets lnnovasjonsselskap AS: 1.000.000 kr
* Startuplab: 600.000 kr
* Kunnskapsparken Vestland AS: 1.000.000 kr
* Klar bedrift AS: 300.000 kr
* Aksello AS: 700. 000 kr
* Medvind24 Næringhage: 150.000 kr
* Vekst i lag: 250.000 kr
Grannar opplyser: Grannar AS er leigetakar hos Medvind24 Næringshage. Det har ingen innverknad på redaksjonelle prioriteringar.
