Yrke og utdanning
Ein meiningsfull arbeidskvardag
— Dei som jobbar her, er utruleg glade i jobben sin, seier Bergfrid Kolltveit.
Lærarkarriera hennar starta rett etter at ho var ferdig utdanna i 2006. Sidan 2012 har ho jobba i Vikebygd, kor ho er ein av seks lærarar. Skuledelen av oppvekstsenteret har 27 elevar frå 1. til 7. klasse. Kolltveit er kontaktlærar for sju barn i 1. og 2. klasse.
Annonse
Under Grannar sitt besøk står KRLE på timeplanen. Dei unge får høyre om Big Bang og evolusjonsteorien på den eine sida og skapingshistoria på den andre. Kolltveit spurde elevane om det gjer noko at folk trur på ulike ting og forklarte at det går heilt fint.
Læreglede
Etter at læraren hadde gått gjennom det ho skulle, fekk elevane i oppgåve å teikne Edens hage. Dei teikna fargerike hagar, men skepsis til kyssing og nakenheit fekk alle til å droppe Adam og Eva. Kolltveit syntest dei var strenge som ikkje ville ha noko av kyssing. Ho poengterte òg at dei sjølve må dusje når dei skal bade i Ølen. Motvilje blei snudd til jubel då dei fekk vite at symjehallen i Vats, som opnar til våren, skal ha sklie. Gjennom timen kunne ein merke ei kollektiv trivselskjensle.
— Eg synest det er kjekt på skulen og likar Bergfrid godt. Favorittfaget mitt er matte, fortel andreklassingen Hanne Årvik.
Annonse
Dei seks andre elevane svara det same om skulen og læraren. På favorittfag varierte det meir. Blant anna likar Maria Storonowicz kunst og handverk best, sidan ho synest det er kjekt å teikne og lage ting.
Å jobbe på oppvekstsenteret gir Kolltveit mykje. Ho fortel at dei gjer kjekke ting som turar og temaveker saman. Spurt om kvifor folk bør bli lærarar, trekker ho fram samfunnsansvaret for å sørgje for at barn får utdanninga dei har rett til og trivselen i yrket.
— Ein gler seg til å gå på jobb kvar dag når ein møter barna i døra, seier Kolltveit.
Det trengst ifølgje Kolltveit fleire utdanna lærarar. Ho poengterer at det finst fleire måtar å bli lærar på. Ein kan gå lærarlinja på høgskule eller ta utdanning innan utvalde fag og eit år med praktisk pedagogikk.
Denne dagen var Jenny Alice Berentsen Trovåg (16) på sin første dag som utplassert på skulen. Til vanleg går ho første året på helse- og oppvekstfag på Ølen vidaregåande skule (vgs). Ho kan tenke seg å bli lærar, men hovudplanen er å bli barne- og ungdomsarbeidar i barnehage.
— Det er kjekt å jobbe med ungar og sjå korleis dei utviklar seg, seier Trovåg.
Annonse
Nesten som eigne ungar
Vik oppvekstsenter sin barnehagedel ligg vegg i vegg med skulen. Her går 30 barn, fordelt mellom ein avdeling for barn i alderen 1-3 år og ein for 3-6-åringar.
Alle dei fem som jobbar i barnehagen, bur i Vikebygd. Blant desse er Charlotte Flydal Myklebust og Beate Dommersnes. Dei er einige om at det er knallkjekt og givande. Myklebust tar utdanning medan ho jobbar, noko ho anbefaler til alle som vil. Ho er tydeleg på at folk som vurderer det, bør utdanne seg til å jobbe i barnehage.
— Me har verdas viktigaste jobb, og den kjem til å bli viktigare. I ein så liten barnehage følgjer me dei frå dei er små til dei begynner på skulen. Dei blir nesten som dine eigne ungar, seier Myklebust.
Barnehagen i Vikebygd er ifølgje Myklebust heilt unik. Ho seier at dei har mykje moglegheiter for friluft og går til sjøen, fjell og ein lavo når det passar. Ein mogleg framtidig tilsett er Thea Rødde (16), som var utplassert frå helse- og oppvekstfag på Ølen vgs. Ho vil gjerne jobbe i barnehage og likar å sjå ungar trivast og vekse opp.
Denne dagen hjelpte dei vaksne barna med å få på seg kjeledressar for å gå ut og leike i snøen. Då dei kom ut, var stemninga stor. Særleg ein akebakke var populær.
Annonse
— I barnehagen er det kjekt, seier Marie Tveit, som var blant barna som koste seg denne dagen.
Pensjonistar stiller opp
Einingsleiar Hilde Bjelland Abelseth har ansvar for både skulen og barnehagen. For ho er det ein spennande og kjekk jobb, som er allsidig og travel. Med skule og barnehage blir det blant anna to lovverk å forhalde seg til.
— Det er mykje administrasjon, men eg får møte barn kvar dag, seier Abelseth.
Ein fordel ho har i bemanningskabalen, er at fleire tilsette kan bidra på skule, barnehage og SFO. Det har ifølgje Abelseth vore litt vanskar med å få vikarar rundt om i Vindafjord. I Vikebygd har dei brukt pensjonistar som ho omtalar som fantastiske.
Abelseth meiner oppvekstsenteret har verdas flottaste uteområde, så vel som eit godt arbeidsmiljø. Ein annan fordel ho ser for folk som vurderer å søke jobb hos dei, er kor tett kontakt dei har med bygda.
Satsar på folk
Vindafjord og Etne kommune jobbar aktivt med rekruttering til skular og barnehagar. Gode arbeidsmiljø og kontakt med unge er nøklar for å lokka til seg kvalifiserte lærarar og fagarbeidarar.
— Me har klart å samla oss og går saman til det beste for barna, seier kommunalsjef Mona Rasmussen Sævik for oppvekst i Etne kommune.
Enge- og Skånevik skule har 94 tilsette fordelt på 80 årsverk, medan kommunen sine to barnehagar har 45 tilsette fordelt på 34 årsverk.
Annonse
Byggjer for tryggleik
Sævik fortel det er nokre utlyste stillingar, blant anna avdelingsleiar for ungdomssteget ved Enge skule, styrarstilling i Skånevik barnehage og leiarstilling ved Skånevik skule. Dei samarbeider med høgskulane gjennom Forum for oppvekst i Sunnhordland, der rekruttering er eit tema. Barnehagane og skulane i Etne har tett samarbeid med UH og NLA i utviklingsarbeid. Kommunen satsar også på prosjektet Ung i jobb», som startar i 2025 og gjev unge høve til å arbeida i einingane.
Ifølgje Sævik er det viktigarste kva gjeld rekruttering å visa at dei set god retning, jobbar med mål og meining, og får fram kvalitetane i barnehagane og skulane. Sævik seier at dei er heldige som har gode tilsette og har hatt gode søkjarar i hovudopptaket kvar vår.
— Dei som kjem til oss, vil sjå barnehagane og skulane som samarbeidande einingar. Me byggjer tryggleik og strukturar som tek vare på både born og tilsette, seier ho.
Høve for utvikling
Vindafjord kommune har ni skular og seks kommunale barnehagar. Kommunalsjef Ingebjørg Rullestad Gjerde for organisasjon fortel at skulane har cirka 124 pedagogårsverk, og at tala i Grunnskulen sitt Informasjonssystem (GSI) viser 140 lærarar og 58 fagarbeidarar. Dei kommunale barnehagane har 26 pedagogårsverk.
Ifølgje GSI-tala er det 17 lærarar som ikkje oppfyller kompetansekrava for tilsetting. Kommunalsjefen understrekar at dette kan variera gjennom året. Per i dag er det utlyst cirka sju pedagogstillingar av ulik storleik på skulane. Kommunen har ei arbeidsgruppe som jobbar med strategisk rekruttering.
— Målet vårt er å visa at kommunen er ein spanande kompetansearbeidsplass, der me treng mange yrkesgrupper som fagarbeidarar, pedagogar, sjukepleiarar, vernepleiarar og fleire, seier Gjerde.
Kommunalsjefen omtalar dei tilsette som deira beste rekrutteringsambassadørar. Kommunen prøver å gjera seg synleg på yrkesmesser, rekrutteringsmesser, karrieredagar og karrierekveldar. Dei tek imot studentar som skal ut i praksis, og vidaregåandeelevar på jobbdagar. I tillegg samarbeider dei med høgskular og universitet gjennom barnehage- og skuleeigarnettverket på Haugalandet og Rogaland.
Vel ein å bli lærar eller barnehagepedagog hos Vindafjord kommune, vel ein ifølgje Gjerde ei framtid med ei viktig samfunnsrolle, samt ein trygg arbeidsplass med gode pensjonsordningar. Ho lokkar også med eit sterkt fagmiljø, kursing og utviklingsmoglegheiter.
