Dyr straumrekning for lokale hallar

— Det er cirka mellom 80.000 og 90.000 meir enn året før, men så må me hugse at det i 2020 var låge prisar og desember 2021 var kald, slik at det i fjor var noko større forbruk, seier styremedlem Jarle Haugen.

Sparing

Grunna koronapandemien har det vore lite aktivitet og utleige av Skjold Arena. Haugen fortel at leiinga har brukt høve til å halde kostnadane nede.

— Me har gått på sparebluss» og berre gjort det aller mest nødvendige vedlikehald og investeringar. På denne måten har me klart å gå nokolunde i balanse. Med dei straumprisane som kom på slutten av året og inn i det nye året, så må vi nok tære på oppsparte midlar, seier Haugen.

Straumstøtta vil etter Haugen si meining vere kjærkommen. I staden for å bruke energi på å jobbe dugnad eller ha innsamling til straumrekninga, kan dei nå bruke tid og energi på å drive arbeid som kjem skjoldabuar til gode.

Haugen beskriv at Skjold Arena akkurat nå opplever å bli angripe» frå to kantar, dvs. både restriksjonar på utleige og veldig høge straumprisar.

— Det er nok ein situasjon vi ikkje kunne levd så lenge med, men ingenting varer evig ei heller korona eller høge straumprisar, seier han.

Varmepumpekluss

Vikedal idrettshall har møtt ei heilt spesiell utfordring, som gjer tala på straumrekningane frå 2021 og 2020 lite samanliknbare. Heilt sidan hallen opna i 2011 har den hatt ei varmepumpe, men i fjor sommar gjekk denne ut av drift.

— Me bestilte ny 1. juni, men på grunn av koronaforseinking hos leverandør, ombygging av røyr, samt ny buffertank, har me ikkje fått den i drift før tredje veka i januar i år, fortel styreleiar i Vikedal bygdahus, Jan Magne Staurland.

Det er Vikedal bygdehus som betalar straumrekninga for hallen. På grunn av situasjonen har varmen i hallen blitt skrudd ned til eit minimum.

— Skulle me hatt komforttemperatur, hadde det blitt altfor dyrt, meiner Staurland.

I Skånevik auka den samla straumrekninga til Skånevik Kultur- og Idrettshall for november og desember frå 17.449 kroner i 2020 til 54.916, med andre ord over ei tredobling. Dette opplyser dagleg leiar Marita Johansen.

Også kommunen må betale meir

Vindafjord kommune disponerer garderobane og lysanlegg ute ved Vikedal idrettshall, og betaler difor straumen for dette. For novembermånaden hadde straumkostnadane auka frå 2.162 kroner i 2020 til 4.305 i 2021, mens auken for desembermånaden var frå 2.768 til 5.865. Dette opplyser einingsleiar for kommunaltekniske tenester i Vindafjord kommune Marit Ø. Ilstad.

Kommunen eig også Ølen idrettshall og Ølen symjehall. Ilstad fortel at straumrekninga til symjehallen blir målt saman med Ølen skule sidan hallen ikkje har eigen straummålar. For idrettshallen auka novemberrekninga frå 10.967 kroner til 16.286 på eit år, mens den for desembermånaden auka frå 11.113 til 18.528 kroner,.