Årets laksefiske er stansa i fleire elvar i Sør-Noreg og kan bli stansa i elvar over heile landet. Det blir inga kompensasjonsordning for dei ramma.
Langs elvane er det fleire hotell og gardar som vanlegvis tek imot fiskarar frå inn- og utland. Dei opplever no avbestillingar frå gjester og dermed tapte inntekter, skriv E24.
Miljødirektoratet har stengt laksefisket i 33 elvar sør for Nordland. Dei skal ta ei ny vurdering av situasjonen 5. juli.
Venstre-leiar Guri Melby har stilt spørsmål til klima- og miljøminister Andreas Bjelland Eriksen (Ap) om på kva måte regjeringa vil kompensere berørte aktørar for bortfall av inntekter som følgje av Miljødirektoratets vedtak».
– For alle praktiske formål vart laksefisket stengt med nærast omgåande verknad, utan dialog først og med mogleg store økonomiske konsekvensar for grunneigarar, reiselivsnæring og anna lokalt næringsliv, skriv ho i eit skriftleg spørsmål til Eriksen.
Planlegg inga kompensasjonsordning
No har klima- og miljøministeren svart.
– Det eksisterer per i dag ingen kompensasjonsordningar for bortfall av inntekter på grunn av reguleringar av fisket, og regjeringa planlegg heller ikkje å innføre ei slik kompensasjonsordning, svarer han.
Terje Sørvik, som er vald inn på Stortinget for Arbeidarpartiet i Nord-Trøndelag, slår fast at det lokale næringslivet står i ein veldig krevjande situasjon.
– Eg vil halde fram med å formidle vidare innspel og forslag som kjem både frå næringsliv og lokale politikarar til sentralt nivå, seier Sørvik.
– Oppdrettsnæringa må finansiere kompensasjonsordning
Også Raudt og SV meiner det er på sin plass med kompensasjon, men dei meiner ordninga må finansierast av oppdrettsnæringa.
– Vi har stor forståing for kravet om kompensasjon frå elveeigarar og andre som taper pengar på stansen i laksefisket. Derfor vil vi be regjeringa opprette eit kompensasjonsfond som kan gi støtte til dei som no lid økonomiske tap, seier Lars Haltbrekken i SV.
Raudt meiner det er svakt av regjeringa å seie nei til kompensasjon.
– Laksebøndene mistar inntektsgrunnlaget sitt, mellom anna på grunn av oppdrettsnæringa. Det burde vere ei smal sak for regjeringa å varsle at dei innfører ei kompensasjonsordning som oppdrettsnæringa bidreg til å finansiere, seier stortingsrepresentant Seher Aydar.
(NPK)
