Ny storsiger – jagar opprykk
Ølen IL står med 12 -1 i målforskjell etter to kampar i årets 6. divisjon. Laget seglar opp som favoritt til å rykke opp denne sesongen.
Torvastad 2 var med i kampen omlag åtte minutt, før vertane gjorde kort prosess. To minutt seinare var stillinga 2-0 til heimelaget etter ei kontrollert avslutning frå Andreas Madsen, og ei heading av Håvard Stople. Dette gav ein indikasjon på korleis resten av kampen skulle bli. Torvastad 2 var slett ikkje dårlege i banespelet, men i dei to boksane var Ølen IL overlegne.
Oppjustert midtbanekvalitet
Dei to heimvendte spelarane, Sverre Ramsfjell og Håvard Stople, som har spelt i Etne IL dei siste sesongane, gjev ny kvalitet til midtbanen til Ølen IL. Dei to har kvalitet nok til å spela eit par hakk høgare enn 6. divisjon, og gjev ein ny dimensjon til spelet. Ramsfjell med sin eminente teknikk og blikk for spelet, og Stople med si kjemping og ledaregenskaper som er gull verdt for eit lag i utvikling. Stople viste seg óg som ein med nase for mål, med sine to skåringar med hovudet.
