Oppsving for tomteselskap

— Me har ein god posisjon og driv til å auke aktiviteten, seier dagleg leiar Morten Helland i Vindafjord Tomteselskap AS.

Vindafjord Tomteselskap er eit offentleg-privat aksjeselskap etablert i 2009, som utviklar og sel tomter og bustadprosjekt. Det blir eigd av Vindafjord kommune, Knapphus Energi, Osakongen Eiendom, Westcon Yards, Smea, Omega 365, Nappholmen, Berge Sag, MittDistrikt Invest og ingeniør Nils Reimers.

Selskapet eig 25 tomter, og i tillegg marknadsfører og sel dei Vindafjord kommune sine bustadtomter: 30 ferdig opparbeidde og 11 som manglar infrastruktur.

Utvikling i staden for avvikling

Sidan starten har tomteselskapet opparbeidd over 220 tomter og selt over 160. Det har vore gode og dårlege tider, og i 2022 vedtok kommunestyret å gå i dialog med dei andre eigarane om å avvikle selskapet. Kommunen snudde etter kvart, og kommunestyret vedtok i starten av 2024 å bidra med inntil fem millionar kroner i ei oppkapitalisering i selskapet. Med bidrag frå lokalt næringsliv fekk selskapet henta inn totalt 14 millionar kroner.

Vedtekter og selskapsavtalen blei justerte, og tomteselskapet fekk eit nytt styre med Anne Marit Helgevold, som er direktør business support & strategi i Helgevold, som styreleiar. Med seg har ho Janne Urdal Aursland, underdirektør region i Sjøfartsdirektoratet, Rune Furseth, CFO i Nor Log, Lars Gunnar Berge, økonomisjef i Berge Sag, Arne Gunnar Habbestad, avdelingsleiar i Omega 365 Consulting, og Arne Matre, dagleg leiar i Westcon Hexacage. Morten Helland var dagleg leiar før oppkapitaliseringa og haldt fram etter.

— No verkar det som det har lausna litt i marknaden. Det er litt meir etterspurnad og aktivitet, seier Helland.

Situasjonen i selskapet etter oppkapitaliseringa omtalar han som god. Tomteselskapet vurderer stadig nye prosjekt, og har ifølgje den daglege leiaren kapital og posisjon til å starte dei. Han fortel at dei vil sjå om det blir konsentrert busetnad eller utvikling av tomtefelt – eventuelt ein kombinasjon.

Utviklarar ser moglegheiter

Etter oppkapitaliseringa har Vindafjord Tomteselskap selt seks tomter, alle i Vågshagen. Helland opplyser at det er fleire sal i prosess i andre bygder òg. Han meiner at det har blitt auka etterspurnad etter leilegheiter.

Vidare fortel han at ein del av salet går til bustadutviklarar, som igjen ser at det er etterspurnad etter mindre einebustader og tomannsbustader. Generelt er det i større grad bustadutviklarar/byggefirma som tek kontakt for å høyre om moglegheitene.

— Dei spør etter flate tomter der dei kan byggje alt på eitt plan, fortel den daglege leiaren.

Vil betre synlegheita

Spurt om kor tomteselskapet helst skulle hatt fleire tomter, svarar Helland at det er prekært og minst tomter i Ølen og Sandeid, der det òg er stor etterspurnad. I tillegg ønskjer han seg meir i dei bygdene der det er minst avsette tomter. He viser til at det for tida blir jobba med å lande ein kommuneplan som adresserer det, men Statsforvaltaren i Rogaland hadde ein del motsegn som gjer arbeidet krevjande.

— Samarbeidet med kommunen er godt. Me er tett på kommuneadministrasjonen, forklarar Helland.

Kva gjeld tomtesituasjonen i Vindafjord generelt, synest han det er ønskeleg med fleire tomter, med større variasjon i storleik og type.

Under eit formannskapsmøte 25. november informerte kommunalsjef Halfdan Krohn Brekke for samfunnsutvikling om tomteselskapet og tomtesituasjonen generelt. Frå politikarane kom det fleire ønske om at det skal bli meir synleg kva tomter som er tilgjengelege. Helland erkjenner at synlegheit er noko dei kunne vore betre på.

— Tomtene er annonserte på heimesida til tomteselskapet og på finn.no. I tillegg er me ute og marknadsfører på arrangement og andre relevante arenaer, fortel han.

Eit av ønska som blei løfta i formannskapet, er ein felles oversikt over kommunale tomter, tomteselskapet sine tomter og private tomter i Vindafjord. Helland seier at det absolutt er aktuelt å få laga ein slik.

Viktig partnar

Under formannskapsmøtet sa kommunalsjef Halfdan Krohn Brekke for samfunnsutvikling at oppkapitaliseringa er og var ein gladsak. Kommunalsjefen synest samarbeidet med Helland og styret er godt. Han fortalde at kommunen bruker tomteselskapet som ein sparringspartnar og ein aktør i arbeidet med arealdelen av kommuneplanen.

— Tomteselskapet er blitt ein veldig god samarbeidspartnar, og me er fornøgde med framdrifta. Dei er vårt salsorgan og gjer ein kjempejobb, sa Krohn Brekke.

Kommunalsjefen tenkjer at tomteselskapet er ein viktig aktør når det gjeld investeringstakta i tomter som kommunen må sjå på framover. Han reflekterte over at feltet i Vågshagen lenge låg utan aktivitet før dei seks sala.

— Det viser seg ofte at når det først kjem ein kjøpar, så kjem det fleire, sa kommunalsjefen.

Fordel på pris

Krohn Brekke understreka at dei kommunale bustadtomtene framleis representerer store moglegheiter, sjølv om interessa ikkje er på topp akkurat no. Kommunen vil kome tilbake med ei sak om korleis tomtene kan brukast for å trekkje til seg nye innbyggjarar og få meir fart i salet.

I møtet gjekk han gjennom desse områda med kommunale tomter:

• Øvrehagen i Ølen (fire salsklare tomter, og tre utan nødvendig infrastruktur)
• Hjartåkerfeltet på Bjoa (fire salsklare tomter, og åtte utan nødvendig infrastruktur)
• Lio-feltet i Vikebygd (16 byggje- og salsklare tomter)
• Kårhus-feltet i Vats (tre salsklare tomter)
• Søndenåset i Vikedal (ei salsklar tomt)
• Ølmedal/Imsland (to salsklare tomter)

Eit viktig moment Krohn Brekke trekte fram, er at det har blitt svært dyrt med infrastruktur. Frå sikre kjelder blir det opplyst at det kostar om lag 500.000 kroner per tomt berre i infrastruktur når ein skal etablere nye felt. Prisane på Vindafjord sine kommunale tomter er frå 100.000 til 500.000 kroner.

— Me har eit stort fortrinn med dei billige tomtene, sa ordførar Ole Johan Vierdal (Sp) i debatten som følgde kommunalsjefen sin presentasjon.

Øyvind Valen (Ap) tok til orde for at kommunen må ta opp igjen korleis dei kan utnytte at dei har så låge tomteprisar, noko han meiner ikkje alltid kjem nok fram. Krohn Brekke fortalde at tomteselskapet sine tomter ligg jamt over i det øvre sjiktet av der dei kommunale er på pris.

Spurt om kor det er private tomter, ramsa kommunedirektør Yngve Folven Bergesen opp at i Vikedal er det Søndenå 2 og Holmen. I Sandeid blant anna Bala. På Vikaneset i Skjold ligg det fleire. I tillegg Knapphus 2 i Vats og Trovåg 2 i Vikebygd. Krohn Brekke poengterte at for alle tomtene kommunedirektøren nemnde, er prisane svært gunstige samanlikna med dagens kostnader for tomtebearbeiding.

— Kom til Vindafjord – her har me billige tomter, sa Folven Bergesen med eit glimt i auga.

Villige til å omregulere

Modolf Haraldseid (H) uttala at det største potensialet ligg i å få fleire leilegheiter slik at ein frigjer bustadar når eldre personar flyttar i meir tilpassa heimar.

— Då blir fleire einebustadar ledige for nye generasjonar. Det er eit stort potensial – byggekostnader for nye bustadar er svært høge no, sa Haraldseid.

Valen slo fast at kommunen bør vere open for å seie til utbyggjarar at om det ligg ei einebustadtomt der, så er dei villige til å gjere planendringar som gjer det mogleg å byggje fleirbustadar. På same møtet vedtok formannskapet einstemmig å endre reguleringa på ei tomt i Ølen frå einebustad til konsentrert bebygging.

Krohn Brekke poengterte at i den nyleg vedtekne bustadstrategien seier dei at kommunen si innsats skal liggje i å få konsentrerte bustadar.

— Det er der me set inn støytet, avslutta kommunalsjefen.

Klar for å byggje sentrumsleilegheiter