Fartsfullt nytt tilbod

— Me må prøve å få til litt ulike aktivitetar i bygda, seier styreleiar Bjørn Alvseike i Ølen Ung og Aktiv.

Prosjektet er eit samarbeid mellom Ølen Ung og Aktiv og Ølen IL. Anlegget består av ein stor og ein liten RC-bane.

Alle kan vere med

Alvseike fortel at banane no er i drift. Folk har prøvd dei, men det blir fleire tilpassingar og det skal setjast inn beplantning når våren kjem. Per i dag er begge flate, men det skal bli meir terreng i den minste banen, slik at han blir meir kupert.

På spørsmål om kvifor dei vil ha RC-banar, svarar Alvseike: Kvifor ikkje? Han ønskjer at det skal vere fleire aktivitetar enn dei tradisjonelle i Ølen.

— Ikkje alle spelar fotball, og det er òg mange som spelar fotball som vil prøve noko anna. Me vil gi tilbod til ungdommar, men det er også eldre som har kjøpt seg bilar, seier styreleiaren.

Han fortel at folk frå 7 til 85 år har testa banane allereie.

Bilar til låns

Ideen om prosjektet har vore der i fleire år, men det var først for nokre månadar sidan prosessen blei sett i gang. Alvseike seier at dei tenkte på det lenge før dei fekk fingen ut, men at det har gått radig sidan.

Til våren vil anlegget etter planen vere heilt ferdig. Totalkostnaden ligg på rundt 70.000 kroner, inkludert nokre RC-bilar som er kjøpte inn.

— Me har ni bilar, opplyser styreleiaren.

Desse blir utlånsbilar, slik at alle kan vere med og køyre. Alvseike var initiativtakar for prosjektet, og sidan har fleire bidrege.

— Me har fått inn ein glimrande leiar for banen i Tommy Johansson, avsluttar Alvseike.