36 ungdommar lada opp til fotballsesongen i Spania

Treningsleiren til Spania er ein del av ei rullerande ordning der både gutelag og jentelag får utanlandstur i løpet av dei tre åra på ungdomsnivå, slik at alle spelarane får same moglegheit over tid. For tre år sidan var det gutane som reiste, og i forfjor var det jentene sin tur. Årets 36 spelarar er rekordmange.

Dette opplyser Johnny Vik, som var med på leiren som trenar og er leiar i Ølen IL. Willy Solheim, Alexsander Stene Krogh og Ole Arne Pedersen var også med som trenarar.

G19-troppen reiste tysdag og kom heim laurdag etter ein kompakt og intensiv leir. I løpet av opphaldet vart det gjennomført fem treningar, inkludert ein internkamp. Idrettslaget stiller med to G19-lag i seriespel denne våren.