Tausheit er ikkje gull

Eg vil ikkje skrive om dette. Det er for sjukt, for ekkelt, for drøyt.. Epstein-saka, med alle sine stadig fleire forgreiningar; har dominert nyheitene dei siste vekene. Ei heil verd er sjokkert. Korleis kunne noko slikt skje? 

Forrige veke såg eg eit intervju med ei av dei fornærma kvinnene i Epstein-saka i Debatten på NRK. Marina Lacerda sat rakrygga og fortalde si rystande historie midt i beste sendetid. Ei vaksen kvinne sto opp for seg sjølv som ung jente. Ho oppfordra alle som hadde hatt kontakt med Epstein til å vere ærlege og ta ansvar. Alle må ha visst kva som føregjekk, sa ho. 

Over så mange år, og i så stort omfang. Dei første historiene blei kjent så langt tilbake som i 1996. Først i 2008 blei Epstein dømd, men då for langt færre forhold enn det han blei sikta for. Han trua og kjøpte seg ut av det meste. Likevel; allereie frå 2008 var han kjent som ein dømd seksualforbrytar. Deretter gjekk det igjen altfor mange år før han blei tiltalt for omfattande menneskehandel med mindreårige i 2019. Truleg blei totalt rundt tusen jenter, mange av dei mindreårige; misbrukt over ein periode på to tiår. Kvifor blei han ikkje stoppa lenge før?