Vond Mowi-lukt blei tema på næringsfrukost
Dei fleste har køyrt forbi smoltanlegget på Fjæra, men under frukosten fredag morgon fekk dei 36 frammøtte frå næringslivet informasjon om kva som skjer på innsida også.
Driftsleiar ved Fjæra-anlegget, Asle Lægreid kunne fortelja at Mowi totalt leverte 465.600 tonn laks i 2021, og berre i Fjæra produserte dei 1.000 tonn smolt. Anlegget på Fjæra er også i gang med å utvida produksjonen og skal no levera opp mot 4.600 tonn smolt i året.
Lægreid som er fersk i rolla som driftsleiar er imponert over arbeidet som er lagt ned, og anlegget som er bygd opp, men har støytt på nokre utfordringar etter utbygginga som stod ferdig i fjor. Det handlar om luktproblematikk frå slamanlegget som dei hadde håpa på å få bukt med før jul, men som framleis ikkje er løyst.
