Vindafjord-ordførar Ole Johan Vierdal (Sp, t.v.) og fylkespolitikarane Harald Halvorsen Løland (Sp) og Hanne Marte Vatnaland håpar at Aslaug Johanne Risøy kan helde fram å ta båt til Bergen frå Ølen med sonen Håkon Risøy Ødegaard (3) og dottera Anita Risøy Ødegaard (10 månadar).
FOTO: SVEIN-ERIK LARSEN
Vil redde båt i siste liten
— Me må visa at me klarer å ta innover oss når det blir så tydeleg kva konsekvensane er for folk. Det er ingen skam å snu, seier gruppeleiar Hanne Marte Vatnaland for Rogaland Sp.
Rogaland fylkesting skal behandla revidert budsjett for 2025 under møtet i Haugesund tysdag og onsdag. I det originale budsjettet vedtok det politiske fleirtalet – Høgre, Venstre, Frp og KrF – at Rogaland skal slutta å gi 1,6 millionar i tilskot til Vestland for at snøggbåten mellom Bergen og Sunnhordland også skal vera innom Ølen og Utbjoa. Som følgje av dette vedtok Vestland å leggja ned Ølensambandet.
Vestland sitt kollektivselskap Skyss har justert rutene frå 1. juli, der stoppa i Ølen og Utbjoa er tekne ut.
