Kan kosta 1,7 millionar for 90 minutt

Kommunedirektør Åsmund Andersen Sekse gjorde det klart at kommunen no opererer med eit førebels kostnadsestimat på mellom 1,4 og 1,7 millionar kroner. Dette er knytt til planane om å leggja opp til eit besøk med aktivitetar på tre ulike lokasjonar i kommunen.

Til samanlikning blei det vist til at Vindafjord kommune brukte om lag 1,2 millionar kroner på sitt kongebesøk. Der var arrangementet samla på éin lokasjon, noko som i mindre grad kravde omfattande logistikk og tilrettelegging.

For Etne sin del vil fleire stoppunkt bidra til auka kostnader, både når det gjeld transport, tryggleik, teknisk tilrettelegging og praktisk gjennomføring. Kommunedirektøren understreka at tala som no ligg føre er estimat, og at det framleis er usikkerheit knytt til det endelege kostnadsnivået. Mellom anna ventar kommunen på tilbod på scene, lyd og anna teknisk utstyr, noko som kan påverka totalramma.