Vil ikkje spare i Skånevik

Etter omgjeringa frå sjukeheim til bemanna omsorgsbustadar er det bygd seks slike bustadar i første etasje ved Skånevik omsorgssenter. Denne avdelinga, også kalla Fiol, er tatt i bruk. Men dei åtte bustadane i andre etasje, avdeling Blåklokke, er ikkje opna.

Då Etne kommunestyre vedtok budsjettet for 2018 fekk rådmannen politikarane med på at opninga av andre etasje ved omsorgssenteret i Skånevik først skulle opnast att ved behov». No har administrasjonen bede politikarane gjere greie for korleis orda ved behov» skal tolkast. I eit framlegg rår rådmannen til at andre etasje kan opnast når ein har til saman ti kvalifiserte søkjarar. Han legg til grunn at det ligg eit innsparingspotensial på over 83.000 kroner i månaden med å vente med å opne andre etasje.

I formannskapet støtta Sp og Høgre framlegget, medan fleirtalet, Ap, KrF og Frp, var klare på at avdelinga skal opnast straks det ligg føre éin kvalifisert søkjar.