Investering i openheit eller i lukkingskultur?

Dette er eit lesarinnlegg. Innhaldet gir uttrykk for skribenten sine eigne meiningar og haldningar.

I Grannar 14. april kunne me lesa at Etne kommune brukar store ressursar på å svara ut innsynskrav. Kommunedirektøren skildrar 270 arbeidstimar og ein kostnad på 140 000 kroner som ein tung bør som tvingar administrasjonen til å nedprioritera viktige oppgåver som brannordninga. Dette er ei uheldig framstilling av ein lovfesta demokratisk rett.

Det vert i artikkelen skapt eit bilete av at innsynskrav er noko som «råkar» kommunen og innbyggjarane negativt. Men retten til innsyn i forvaltinga er ikkje noko kommunen gjev oss av godvilje; det er ein føresetnad for tillit og kontroll i eit fungerande lokaldemokrati. At innsynsarbeidet vert skildra som eit økonomisk og kapasitetsmessig mareritt, vitnar meir om manglande teknisk modernisering enn om urimelege krav frå publikum.