Viss Erna Solberg (H) var inhabil då regjeringa gav Hydro kontroll over kraftverket Røldal-Suldal i 2020, må vedtaket gjerast om. Det meiner lokale grunneigarar.
Foto: Heiko Junge / NTB / NPK
Vil ha nytt kraftvedtak i Ullensvang viss Solberg blir kjend inhabil
I 2020 fekk Hydro overta kraftverket Røldal-Suldal til stor lokal motstand. Viss det viser seg at Erna Solberg var inhabil i saka, vil grunneigarane ha vedtaket gjort om.
Røldal-Suldal-kraftverket vart bygd av Hydro for å gi straum til aluminiumsverket til selskapet på Karmøy. Planen var heile tida at kraftverket etter kvart skulle gå tilbake til staten, men i 2020 bestemde Solberg-regjeringa at Hydro likevel skulle få behalde det gjennom eit samarbeid med det offentleg eigde kraftselskapet Lyse, skriv Klassekampen.
I samband med Finnes-saka vart det kjent at Solbergs ektemann Sindre Finnes selde 4500 aksjar i nettopp Hydro i veka før det vart kjent at selskapet hadde inngått samarbeidsavtalen.
No krev fleire i Ullensvang at viss Solberg var inhabil då det vart bestemt at Hydro og Lyse skulle få kraftverket, må saka takast opp igjen, skriv avisa. Det var nemleg stor lokal motstand mot vedtaket og kommunestyret peika på at kommunen gjekk glipp av millioninntekter.
– Det er sørgjeleg, og det gjer oss forbanna. Vi meiner at vedtaket er ugyldig, og at det bør bli oppheva, seier Olav Rabbe, leiar i grunneigarlaget i Røldal.
Han får støtte frå Høgres ordførarkandidat i Ullensvang.
– Det er ikkje bra, seier Nils-Petter Freim, samtidig som han peikar på at han har tillit til Erna Solberg så lenge det ikkje kjem fram opplysningar om at ho har gjort noko ulovleg.
Ordførar Roald Aga Haug (Ap) seier at han ikkje veit om dette betyr at vedtaket kan gjerast om, men seier at det var eit veldig kontroversielt vedtak og at det er veldig gale» viss Solberg ikkje hadde habiliteten i orden.
(NPK)
