Nyleg hadde Nils Halleland sin siste dag som kultursjef og kulturskulerektor i Etne kommune. Dei to leiartitlane har han hatt i meir enn 13 år, men han byrja i kommunen allereie då han flytta heim til Øvernes på slutten av 90-talet.
Nils vaks opp på Frette i Stordalen. Der fekk han og kameratane tidleg sansen for musikk og gitar blei ein trufast følgjessven. Han kan sjå tilbake på eit langt liv som musikar. Han har vore gitarist på ei mengde tv- og album-innspelingar og turnear for kjende namn som Trond Granlund, Somebody´s Darling og Torry Enghs. Han har vore gründer i fleire verksemder som har handla med instrument og anna musikkutstyr. Han var spent då han flytta heim mot slutten av 90-taler, for å oppfylle bu- og driveplikta på garden som han kjøpte av onkelen sin, og vart dermed 8. generasjon på familiegarden.
— Eg kom frå ein kreativ bransje kor det var vanleg å heie på kvarandre. Så eg kjente nok litt på at eg skulle flytte heim til ein klassisk liten distriktskommune, der eg trudde janteloven hadde gode kår, fortel han.
