Tredoblar tømmer-kapasiteten

Landbruksdirektoratet har innvilga tilskot til utviding av tømmerkaien på Utbjoa i Vindafjord. Til saman skal det totalt investerast over 11 million kroner som skal gå til utviding av kai og opplagsplass. Dagens kai blei anlagt på 1980-talet og er for liten til å kunne ta i mot større båtar. Når den nye kaien står ferdig vil total lengd på kai bli 60 meter og kapasiteten vil auka frå 800 til 2500 kubikkmeter ved kaifronten. Det betyr at meir tømmer kan leggjast direkte på kaien klar for lasting.

— Kaien er for liten for store båtar. Den skulle vore utvida for mange år sidan, seier Harald Hetland og Kjell Gangstø i Vindafjord Skogeigarlag.

Skogeigarlaget har i fleire år søkt om tilskot til å utvida både kai og opplagsområde.

— Me har søkt dei siste 5-6 åra og i oktober i fjor fekk me tilskot. Nå skal arbeidet ut på anbod og me håpar på oppstart til våren. Me håpar me får brukt ein del lokale krefter når kaien skal byggast, seier dei to styremedlemmene i skogeigarlaget.

Spleiselag

Landbruksdirektoratet dekkjer 80 prosent av utgiftene til kai og opplagsområde. Resten blir fordelt på Vindafjord Skogeigarlag, kommunane Vindafjord, Tysvær, Etne, Haugesund, Bokn, Sveio og Karmøy som er brukarar av tømmerkaien og AT Skog og Nortømmer.

— Prosjektet har ein pris på rundt 11 millionar med ein arbeidsfrist til oktober 2026, seier dei.

I prisen inngår også ei dobling av opplagsområdet, frå rundt 4,5 mål til rundt 9 mål. Vindafjord Skogeigarlag eig grunnen og massar frå utgravinga skal brukast på kaien.

Stor pågang

Sjeldan har prisane på tømmer vore så høge som nå og mange skogeigarar vel å ta ut hogstferdig skog i desse dagar. Tal frå Statistisk Sentralbyrå viser at det aldri har blitt hogd så mykje tømmer til industriføremål som i 2014. Totalt enda hogstkvantumet på 11,85 millionar kubikk.

— Mange vil ta ut tømmer. Det er hogstkapasiteten som er flaskehalsen nå, seier Gangstø.

Heile 39 prosent av tømmeret blei eksportert. Det er den høgaste tømmereksporten som er registrert og er ein auke på 7 prosent frå 2023. Frå tømmerkaien på Utbjoa blir det frakta sagtømmer og massevirke til mottakarar i Noreg og ulike hamner i Europa. Talet på kubikk som blir transport frå kaien varierer, men med større kai er håpet at talet på anløp skal gå ned, medan kvantumet går opp. Europa.

Arriva Shipping

Blant reiarlaga som nyttar kaien på Utbjoa er Arriva Shipping med hovudkontor i Ølensvåg. Dei har brukt tømmerkaien i 15 år og har fleire anløp i månaden. Tømmeret går vidare til hamner både innanlands og utanlands.

— Me fraktar mykje tømmer. Det utgjer ein betydeleg del av drifta. Frå kaien på Utbjoa fraktar me tømmer til Skogn i Trøndelag, Wismar og Rostock i Tyskland og Kolding i Danmark, fortel befraktingssjef Knut Norheim i Arriva Shipping.

At større kai snart kjem på plass set han stor pris på. Båtane som i dag blir brukt av reiarlaget lastar frå 3.000 til 6.500 kubikk, og når ny kai kjem på plass kan dei største båtane leggja til kai.

— Dette er ei etterlengta utviding. Dagens kai er ikkje større enn den bør vera. Båtane blir større og nå kan me gå inn med større båtar, seier Norheim som også nyttar kaiområdet på Søndenåneset i Vikedal, i Tysvær, Skånevik, Hardangerfjorden og Bømlo når tømmer skal fraktast ut i verda.

50 millionar kroner

Støtteordninga med tilskot til tømmerkai starta i 2012 og med dette prosjektet er Rogaland kome i mål med å få på plass ein god og framtidsretta tømmerkaistruktur. Frå før har Søndenåneset i Vindafjord, Eigersund og Sauda fått investeringstilskot. Totalt har Rogaland investert 50 milllionar kroner i ombygging av eksisterande og nye tømmerkaiar. På landsplan er det så langt gitt 394 millionar kroner i tilskot til 36 kaiar.