Tok grep etter dramatisk inntektsfall
— Eg er ikkje blitt heilt van med at det ikkje skal vere gardiner her. Men det var nokon som meinte at vindauga ramar inn utsikta til Peparen og Skåneviksfjorden, seier Inger Karin Larsen.
Smilande retter ho på eit av dei mange nye borda ho har fått på plassen ved baren.
Me er inne på Skånevik Fjordhotell, og sjefen er optimist. Meir no enn ho var for berre eit par år sida. Oljenedturen var i ferd med å feste eit grep som truga den tradisjonsrike hotelldrifta i Skånevik. For verksemdene som før gjerne tok turen til Skånevik for å arrangere sine kurs og konferansar, hadde brått lite att i budsjetta til slike aktivitetar i ei tid kor det meste handla om å kvitte seg med tilsette.
