Sterk oppmoding frå kommuneoverlegane
Sterkt aukande smittetal i Vindafjord og Etne kommune har ført til at kommuneoverlegane Terje Kleiven og Elisabeth Winthertun nå kjem med ei sterk oppmoding til alle innbyggjarar.
Torsdag ettermiddag hadde Vindafjord kome opp i 45 smitta, medan Etne stod på 20 personar med covid-19. Som Grannar har skrive aukar talet dag for dag. Blant anna er Sandeid skule, barnehagen i Ølen og Enge skule i Etne direkte berørt av pandemien. Det er venta inn svar på fleire prøvar.
— Situasjonen er uoversiktleg og kommunane driv aktiv smittesporing, konstaterer Kleiven og Winterthun.
Annonse
Slik situasjonen er i dag vil kommuneoverlegane i dei to kommunane på det sterkaste tilrå desse tiltaka frå i dag og til og med onsdag 24. november:
- Personar i risikogrupper bør unngå kollektivtrafikk, og sterkt avgrensa talet på nærkontaktar.
- Arrangement for risikogruppene bør avlysast.
- Alle planlagde arrangement bør nøye vurderast om dei kan utsetjast eller avlysast dei neste to vekene. Dette gjeld også planlagde gruppeturar osv.
- Unødige fritidsreiser bør unngåast.
- Me rår arbeidsgjevarar til å nytta heimekontor der det er formålstenleg.
- Avgrens besøk til personar som er innlagde i institusjonane i Etne kommune og Vindafjord. I tillegg vil institusjonane innføra forsterka tiltak ved besøk.
- Breiddeidrettsaktivitetar for personar over 20 år bør unngåast dei neste to vekene.
Kommuneoverlegane minner også om dei generelle råda:
— Hald avstand – Vask hender – ver heime om du er sjuk – avgrens din sosiale omgang!
Annonse
grannar.no held deg fortløpande oppdatert på smitteutviklinga i Vindafjord og Etne kommune!
