Stemningsfullt på historisk grunn
— Det var heilt fantastisk. Her blir det ei enormt flott ramme rundt ein konsert, og Hilde Selvikvåg passar veldig godt på ein slik plass, seier Anne Marte Waage Tveit.
Sidan ekteparet Veronika og Jone Tveit kjøpte den gamle handels- og industristaden Haraldseidvågen, med totalt 11 bygningar, i 2021, har dei drive eit omfattande restaureringsprosjekt. Dei var strålande fornøgde med responsen frå folk.
Annonse
— Når du først lagar til noko og bruker mykje tid på det, er det alltid kjekt at folk stiller, seier Veronika.
Jone omtalar interessa som over all forventning. Han fortel at dei nok kunne selt fleire billettar, men at dei vil halda det i kontrollerte former og sjå korleis det går denne dagen.
Lappar for skuletur
Søndag var det livleg der i god tid før Selvikvåg gjekk på utescena. Waage Tveit fortel at ho var med på yoga, gongbad og bading i sjøen tidlegare på dagen. Milla Bauge (15), Tia Kvale Frøyland (14) og Vida Tveit (14) laga til ein liten kiosk med steikte lappar, pølser og drikke.
Annonse
— Pengane går til klassetur til Polen i 10. klasse, fortel Milla.
Vida og Milla går på Skjold skule, medan Tia var på besøk frå Stavanger. Kiosken deira var inne i det nærmaste bygget, der det tidlegare var sildafabrikk. Mange tok seg ein kikk inn i den historiske bygningen.
Imponert over idyllen
Rett før konserten ønskte Veronika Tveit dei 90 gjestane på kaien, så vel som nokre personar i båtar, velkommen og fortalde litt om plassen. Så var det tid for popartisten Hilde Selvikvåg, som mellom anna har blitt nominert til ein Spelemannspris.
— Dette har eg gleda meg til lenge, sa Selvikvåg etter første song.
Hagekonsert-konseptet til Selvikvåg blei til under koronapandemien, og har blitt vidareført sidan. Responsen frå publikum var god. Overalt var det blide fjes. Både musikken og historiene til Selvikvåg mellom songane blei verdsette. Ho hadde med seg ektemannen Eirik Stakkeland som lydmann og musikar på nokre av songane.
Annonse
Etter konserten fortalde Selvikvåg at ho synest det var utruleg kjekt å opptre i Haraldseidvågen. Ho omtalar plassen som idyllisk og fullroser vertskapet til ekteparet Tveit.
— Konserten hadde ei utruleg stemning. Det er kjekt at det kom så mykje glade, blide og herlege folk, seier artisten.
Totalt 32 plassar er utvalde til hageturneen hennar denne sesongen. Blant desse er Sandeid, der ho skal til onsdag 18. juni.
Kjekt med aktivitet nær heime
Veronika Tveit var storfornøgd med konserten og arrangementet. Ho seier at det ser ut som folk har kost seg. Det var alle som uttala seg etterpå einige i. Monica Næss omtala konserten som magisk, medan Bente Haraldson Syre brukte ordet knallbra.
— Den kunne vore dobbelt så lang, sa Haraldson Syre, som hadde tatt turen frå Haugesund.
Annonse
Ho synest at Haraldseidvågen er ein fin plass. For Sveinung og Annhild Mortveit Sundfør var turen betrakteleg kortare. Dei bur rett på andre sida av vågen.
— Det er kjekt at det skjer ting lokalt. Dette var ein heilt nydeleg konsert med god atmosfære, seier dei.
