Mannskoret Over Rævne med Erik Rullestad (23) som 1. tenor, planlegg konsert både på Trolltunga i Odda og på Rullestad i Etne kommune til sommaren. Konserten på den kjente fjelltunga opp frå Tyssedal, er tenkt gjennomført 18. august i år og vil skje i samarbeid med Odda kommune.
Over Rævne er eit mannskor som består av ca. 30 studentar ved Norges miljø og biovitenskapelige universitet på Ås. Kvart år legg dei spreke og songglade studentane ut på eit topptur med sitt repertoar og dette året er Trolltunga blinka ut.
— Me held Bjørnstjerne Bjørnson som vårt fremste førebilete, er inspirert av 1930-tals bonden og kler oss deretter. Me syng om fjell, øl og damer, i prioritert rekkefølgje. Om godvêret slår til, meiner me ein konsert på Trolltunga kan bli nasjonalromantikk på grensa til det perverse. Me har eit nokså breitt repertoar, men på Trolltunga vil me prioritera dei mest nasjonalromantiske songane, fortel Erik Rullestad.
